Qaraǵandy oblysynan 3 myń bas qoı arab ámirlikterine eksporttaldy
QARAǴANDY. QazAqparat - Qaraǵandy oblysynda 3 myńnan astam qoıdy arnaıy reıspen Birikken Arab Ámirlikterine jiberdi, dep habarlaıdy «QazAqparat» HAA tilshisi.
Jańaarqa aýdanyndaǵy jaıylymnan úsh myńnan astam «etti saryarqalyq qylshyq júndi aq tústi» tuqymdas qoılar «Myco Trading FZE» iri et óndirý jáne aýylsharýashylyq ónimi úshin alys shetelge jiberildi.
«Alǵash ret qoılar alys shetelge, BAÁ-ge eksporttaldy. Jańaarqa aýdanyndaǵy «Jeńis» asyl tuqymdy mal zaýyty 3 myń bas qoı jóneltti», - dep habarlady Qaraǵandy oblysynyń ákimi Nurmuhambet Ábdibekov halyqqa esep berý barysynda.
Fermerlik sharýashylyq pen sheteldik kompanııa arasyndaǵy kelisimge sáıkes, qoılar Birikken Arab Ámirlikterine aldaǵy ýaqytta aýyl sharýashylyǵy ónimderin jasap shyǵarý úshin soıýǵa jiberiledi.
«10 myń bas qoıdy eksporttaýǵa kelisim jasasqanbyz, sondyqtan bul jumys jalǵasyn tabady», - dedi óńir basshysy.
«Jeńis» asyl tuqymdy mal zaýyty qoılardy ósirýge mamandandyrylǵan. Kásiporynnyń jobalyq qýattylǵy - jylyna 130 tonna qoı ósirýge deıin jetedi. Memleket basshysy Nursultan Nazarbaevtyń bastamasymen jasalǵan «Bes ınstıtýtsıonaldyq reformany júzege asyrýǵa arnalǵan 100 naqty qadam» ult jospary aıasynda eksport taýarlaryn arttyryp, álemdik naryqqa shyǵarý - Qazaqstannyń aldynda turǵan ózekti tapsyrmalardyń biri.
