Qaraǵandy oblysyna «Uly dala áýenderi» jobasymen Dombyra telearnasy keldi
QARAǴANDY. QazAqparat - Qaraǵandy oblysyna «Uly dala áýenderi» jobasymen Dombyra telearnasynyń túsirilim toby keldi. Shyǵarmashylyq ujymdy jergilikti jyrshylardyń, termeshilerdiń, kúıshilerdiń týyndylary qyzyqtyryp otyr, dep habarlaıdy QazAqparat tilshisi.
Bul ekspedıtsııa barysynda operatorlar men arna basshysy Saryarqanyń eki qalasy men bes aýdanyn aralaıdy. Túsirilim Qaraǵandyda bastalyp, Shet, Buqar Jyraý, Jańaarqa, Qarqaraly jáne Aqtoǵaı aýdandarynda jalǵasady. Sońǵy baratyn jeri – Jezqazǵan.
«Dombyra telearnasy 2019 jyldyń naýryz aıynda iske qosyldy. Bizdiń maqsatymyz – ulttyq ónerimizdi keler urpaqqa jetkizý, qazaq halqynyń salt-dástúrlerin nasıhattaý. Ár óńirde ánderdi oryndaý tásili ár túrli. Sondyqtan ótken jyldan bastap biz Qazaqstan boıynsha ekspedıtsııalarǵa shyǵa bastadyq. Túsirilim barlyq oblystarda júrgizildi. Qaraǵandy oblysynan Pavlodar óńirine baramyz. Bul ekspedıtsııanyń sońǵy kezeńi bolady», - dedi Dombyra telearnasynyń dırektory Qanat Erjigitov.
Arna basshylyǵy mundaı saparlardy jyl saıyn ótkizýdi josparlap otyr. Tek oryndaýshylar týraly ǵana emes, sonymen qatar ánderdiń shyǵý tarıhy týraly da aıtylmaq.
Qaraǵandy oblysynyń oryndaýshylaryna arnalǵan baǵdarlama qarasha aıynyń sońynda efırge shyǵady. Dombyra telearnasyn taratý Qazaqstannyń kabeldik jelisinde, sondaı-aq Instagram -da júzege asyrylady.
