Qaraǵandy oblysyna Qytaıdan deklaratsııada kórsetilgen qulpytastyń ornyna kontrabandalyq júkter ákelindi
Bul rette tranzıttik deklaratsııada «qabir basyndaǵy qulpytastar, mármár jáne qurylys materıaldary» delingen.
Bul týraly oblystyq kedendik baqylaý departamentiniń (KBD) baspasóz qyzmetinen habarlaıdy.
«Qaraǵandy oblysy boıynsha KBD-niń qyzmet etý aımaǵyna «Bereke KARGO» JShS meken-jaıyna bara jatqan 6 temirjol vagony jáne «Mol-Kókshe» JShS-ne bara jatqan 4 temirjol vagony kelip jetti. Olar «qazaqstannyń kóliktik holdıngi» ýaqytsha saqtaý qoımasynyń aýmaǵyna ornalastyryldy. Buǵan deıin «Dostyq» kedeninde eki vagondy shekaradan ótý kezindegi jarym-jartylaı aldyn ala tekseris barysynda onyń ishinen tranzıttik deklaratsııada kórsetilmegen halyqtyq tutyný taýarlary anyqtaldy», - delinedi habarlamada.
Vedomstvonyń málimetterinshe, tranzıttik deklaratsııada «qabir ústindegi qulpytastar, mármár jáne qurylys materıaldary» kórsetilgen. Sáıkestendirilgen aqparat oblystyq KBD-ne jiberildi.
«Kedendik tekserý barysynda Qaraǵandy oblysy boıynsha KBD-niń kontrabandamen kúres basqarmasynyń qyzmetkerleri Qaraǵandy kóliktik prokýratýrasynyń ókilderimen birge taýarlardyń tranzıttik deklaratsııalarǵa sáıkes kelmeýin anyqtady. Qoraptardyń ishinde balalar kıimderi, sporttyq kostıýmder, shulyq-dambyl, aıaq kıim, avtobólshekter, jıhazdyq fýrnıtýra, jabdyqtar jáne taǵy basqa taýarlar anyqtaldy», - dep túsindirdi KBD-niń baspasóz qyzmetinen.
Vedomstvonyń aqparatynsha, atalǵan faktilermen materıaldar QR QK-niń 209 baby («Ekonomıkalyq kontrabanda») boıynsha tirkeldi. «Tergeý aldyndaǵy tekseris júrgizilýde», - dep qosyp ótti Qaraǵandy oblysy boıynsha KBD-niń baspasóz qyzmetinen.
