Qaraǵandy oblysyna koronovırýsty anyqtaıtyn ekspress testiler jetkiziledi
QARAǴANDY. QazAqparat - Qaraǵandy oblysyna koronovırýs ınfektsııasyn anyqtaý úshin ekspress testilerdiń alǵashqy partııasyn ákelý josparlanyp otyr, dep habarlaıdy QazAqparat tilshisi.
Atalmysh testiler dárihanalarda satylatyn bolady. Vırýstyń bar-joǵyn bir tamshy qan tamyzyp, testiniń kómegimen anyqtaýǵa bolady. Mundaı synamanyń dáldigi 80 paıyz.
«Jedel testiler ınkýbatsııalyq kezeń barysynda vırýstyń bar-joǵyn anyqtamaıdy, al oń nátıje bolǵan jaǵdaıda egjeı-tegjeıli tekserýden ótý qajet», -dedi Qaraǵandy oblysy Densaýlyq saqtaý basqarmasynyń basshysy Erjan Nurlybaev.
Onyń aıtýynsha, qazir basty mindetterdiń biri – koronovırýs ınfektsııasyn anyqtaıtyn zerthanalardy uıymdastyrý bolyp otyr.
«Taıaý arada biz eki nemese úsh sondaı zerthana ashýdy josparlap otyrmyz. Bul oblystyń qajettiligin óteý úshin jetkilikti bolady», - dep atap ótti Densaýlyq saqtaý basqarmasynyń basshysy.
Onyń aıtýynsha, búgingi tańda oblysta táýlik boıy karantınde 113 adam bar. Alǵashqy túskender úıge jiberile bastady. 16 naýryzda statsıonardan alty adam shyqty - olar karantınniń tolyq merziminen ótip, qajetti taldaý tapsyrǵan. Saraptama nátıjesi boıynsha olardyń qanynan koronovırýs tabylǵan joq. Úı karantıninde 39 adam otyr. Taǵy 284 adam -medıtsınalyq baqylaýda, 273-i qashyqtan baqylaýda. Olardyń eshqaısysynda koronovırýs belgisi joq.
Sondaı-aq, Qaraǵandy oblysynda jedel járdem shaqyrýlar sany ulǵaıǵan joq - barlyq stantsııalar shtattyq rejimde jumys isteýde.
Sonymen qatar óńirde medıtsınalyq maskanyń jetispeýshiligine qatysty másele sheshilýde. «MF Mereı» JShS kompanııasy táýligine 400 myń maska óndiredi. Olar Qaraǵandy, Temirtaý, Balqash, Jezqazǵan jáne basqa qalalardyń dárihanalaryna jetkiziledi.
«Qazir oblystyń arnaıy medıtsınalyq jabdyqtaý bazasynda 173 myń metr marli bar. Biz medıtsınalyq qyzmetkerlerge, polıtsııaǵa, HQKO qyzmetkerlerine jáne adamdarmen tikeleı baılanysta bolatyn basqa da qyzmetterge arnalǵan tańǵyshtardy tigý úshin jol izdeımiz», - dedi Erjan Nurlybaev.
Sondaı-aq, ol baǵany negizsiz kótere otyryp, jeke qorǵaný quralyn satýda alypsatarlyq úshin jaýapkershilik qarastyrylatynyn eske saldy. Monıtorıng kún saıyn júrgiziledi, onyń ishinde ınternet saýda qadaǵalanady.
Erjan Nurlybaev aldyn alýdyń eń tıimdi sharasy ózin-ózi oqshaýlaý ekenin atap ótti. Adamdar kóp jınalatyn jerge barýdan bas tartýdy usynady. Qajet bolǵan jaǵdaıda azyq-túlik alýǵa bir adamdy ǵana jiberý, qarbalas ýaqytta qoǵamdyq jerden aýlaq bolý kerek. Tapsyrys jetkizý qyzmetin paıdalanǵan jón. Sondaı-aq dárigerler medıtsınalyq maska kıip, antıseptık qural paıdalanýdy usynady.
Suraqtar bolsa Densaýlyq saqtaý basqarmasynyń call – ortalyǵyna 8 (7212) 955-559 nómirine qoıýǵa bolady.
