Qaraǵandy oblysyn damytýǵa qosymsha 6 mlrd teńge bólinedi
QARAǴANDY. QazAqparat - Qaraǵandy oblysynyń bıýdjeti ulǵaıdy. Qazyna qosymsha 6 mlrd teńgeden astam qarajatqa tolyqty, dep habarlaıdy óńir basshysynyń resmı saıty.
Bul qarjy aımaqtyń mańyzdy máselelerin sheshýge, eń aldymen Elbasynyń bes áleýmettik bastamalaryn júzege asyrýmen baılanysty mindetterdi oryndaýǵa baǵyttalady.
2018-2020 jyldardaǵy oblystyq bıýdjettiń ózgerýin juma, 4 mamyrda ótken kezekten tys XV sessııada máslıhat depýtattary quptady.
Oblystyq Qarjy basqarmasynyń málimetinshe, aımaq bıýdjeti shyǵyndar boıynsha endi 195,1 mlrd teńgeni quraıdy.
«Oblystyq bıýdjetti naqtylaý nátıjesi boıynsha Qaraǵandy oblysynyń damýyna qosymsha 6 mlrd teńgeden astam qarjy bólinedi. Bul aımaǵymyzdyń birqatar mańyzdy máselelerin sheshýge yqpal etedi, birinshi kezekte ol Elbasynyń bes áleýmettik bastamalaryn júzege asyrýmen baılanysty sharalar. Búgin biz stýdenttik jataqhanalardyń qurylysyn, shaǵyn nesıeleýdi, gaz taratý jelileriniń qurylysyn qoldap otyrmyz. Osylaısha, biz birqatar máselelerdi sheship, bolashaqqa daıyndamalar ázirleımiz», - dedi oblys ákimi Erlan Qoshanov.
Qosymsha qarajattyń úshten birine jýyǵy áleýmettik salany damytýǵa baǵyttalady. Qarajat áleýmettik nysandardyń qurylysyna, mamandardy oqytýǵa, mektep oqýlyqtaryn satyp alýǵa, kámeletke tolmaǵandarǵa psıhologııalyq kómek kórsetýge jáne basqa da qajettilikterge jumsalady.
Jalpy somanyń 22%-y ekonomıkanyń naqty sektoryn damytýǵa baǵyttalǵan. Jol jóndeý jumystaryna, kóktemgi sý tasqynynyń aldyn alýǵa, kommýnaldyq sharýashylyq nysandaryn abattandyrýǵa jáne jóndeýge qosymsha qarajat bólinedi. Shaǵyn jáne orta bıznesti nesıe boıynsha syıaqy mólsherlemesin sýbsıdııalaý mehanızmderi arqyly qoldaýǵa arnalǵan soma ulǵaıtyldy.
