Qaraǵandy oblysy sý tasqynyna daıyndalyp jatyr

QARAǴANDY. QazAqparat - Qaraǵandy oblysynda qardyń deńgeıin ólsheý jumystary júrgizilip jatyr, dep habarlaıdy óńir basshysynyń resmı saıty.

«Qazgıdromet» mekemesiniń oblystyq fılıalynyń jáne Tótenshe jaǵdaılar departamentiniń qyzmetkerleri Nura jáne Sherýbaı-Nura ózenderiniń boıymen Qarqaraly, Shet jáne Buqar jyraý aýdandaryn aralap shyqty.

TJD taratqan aqparatqa saı Qaraǵandy oblysy boıynsha Kalınına, Mataq, Besoba, Qyzyltaý, Qamqor, Aqóre, Kerneı, Sheshenqara, Aqqudyq, Toǵyzqudyq, Qýshoqy, sondaı-aq «Josaly» shıpajaıy men «Ógiztaý» qystaǵynyń mańynda qardyń qalyńdyǵyn ólsheý jumystary júrgizildi.
- Aralaý jumystary 12 baqylaý núkteleri boıynsha ótkizildi. Ol úshin TJD-niń «TREKOL» jol talǵamaıtyn kóligi paıdalanyldy. Marshrýttyń jalpy uzyndyǵy 1350 shaqyrymdy qurady. Ólsheý jumystary qardaǵy sýdyń deńgeıi qazir shekti birlikten tómen ekenin kórsetti, - deıdi Qaraǵandy oblystyq Tótenshe jaǵdaılar departamentiniń baspasóz hatshysy Janna Dáýrenbekova.