Qaraǵandy oblysy Prezıdenttiń saılaýaldy baǵdarlamasyn iske asyrýǵa kirisedi

QARAǴANDY. QazAqparat - Qaraǵandy oblysynyń ákimdiginde ótken apparat jınalysynda Qazaqstan Respýblıkasynyń Prezıdenti Qasym-Jomart Toqaevtyń saılaýaldy baǵdarlamasyn júzege asyrý jospary talqylandy. Oblys ákimi Erlan Qoshanov jumystarǵa qysqa merzimde kirisýdi tapsyrdy, dep xabarlaıdy QazAqparat tilshisi.

Saılaýaldy naýqan kezinde Qasym-Jomart Toqaevtyń shtaby elimizde usynystar jınaý boıynsha «Birge» atty respýblıkalyq aktsııa ótkizdi. Azamattardan barlyǵy 500 myńnan astam ótinish qabyldandy.

«Qaraǵandy oblysynyń turǵyndarynan 65 myń usynys tústi. Olardyń barlyǵy Prezıdent saıtyndaǵy málimetter bazasyna engizildi. Qaraǵandylyqtar Memleket basshysyna kóbine áleýmettik kepildikter alý týraly jazǵan. Ekinshi orynda bilim berý máseleleri, sonan soń turǵyn úı jáne TKSh máselesi. Sondaı-aq qaraǵandylyqtardy jumyspen qamtý jáne densaýlyq saqtaý máseleleri tolǵandyrdy», - dedi «Nur Otan» partııasy Qaraǵandy oblystyq fılıaly tóraǵasynyń birinshi orynbasary Qadısha Ospanova.

Ol sondaı-aq, osy máselelerdiń barlyǵyn jáne olardy sheshý joldaryn partııa músheleri talqylap, aıtylǵan máselelerdi tikeleı sheshýge kirisýge daıyn ekenin atap ótti.

Erlan Qoshanov qol astyndaǵylarǵa áleýmettik mańyzy bar taýarlardyń baǵasyn ustap turý, eńbek aqylaryn kóterý, áleýmettik tólemderdi alýǵa qol jetimdilikti qamtamasyz etý boıynsha jumystardy jalǵastyrýdy tapsyrdy.