Qaraǵandy oblysy Nura aýdanynda sý tasqynynan zardap shekken 14 otbasy baspanaly boldy
QARAǴANDY. QazAqparat - Qaraǵandy oblysy Nura aýdanynyń Kertindi jáne Tassýat aýyldarynda kóktemgi sý tasqynynan zardap shekken 14 otbasy jańa úıge kóshti, dep habarlady oblystyq ishki saıasat basqarmasynan.
«Qaraǵandy oblysynda kóktemgi sý tasqynynan zardap shekkenderge úı tapsyrý sharýasy jalǵasyp jatyr. Nura aýdanynda bes aýyl sý basý aýmaǵynda qaldy. Táýelsiz saraptama nátıjesinde Kertindi aýylynda 4 jáne Tassýat aýylynda 7 úı (10 páter) apattyq jaǵdaıda dep tanyldy. Jańa turǵyn úıler qurylysyna 76,9 mln. teńge bólindi», - delingen habarlamada.
Úılerdi eki merdiger uıym - «Álııa-Qurylys» JShS men «Eloım» JShS saldy. «Bekitilgen kestege sáıkes, 27 tamyzda Nura aýdanynda kóktemgi sý tasqynynan zardap shekkenderdiń barlyǵy baspanaly boldy», - dep atap ótildi habarlamada.
Sonymen qatar, osyǵan deıin japa shekkender ótemaqyǵa qol jetkizdi, úıdi jalǵa alýǵa da ótemaqy tólendi.
Qonys ıeleri bılikke kórsetken qoldaýlary úshin alǵysyn bildirip jatyr. «Úısiz qalmaıtynymyzǵa senimdi boldyq. Sý tasqyny jáne sý tasqynynan keıingi kezeńde de nazardan tys qalǵan joqpyz», - dedi Tassýat aýylynan zeınetkeri Alekseı Koveza.
