Qaraǵandy oblysy kómir óndirisiniń 2041 jylǵa deıingi jobalaryn ázirledi
QARAǴANDY. QazAqparat - Qaraǵandy oblysynda barlyq shahtalar men baıytý fabrıkalarynyń kómir óndirisine qatysty damý strategııalary ázirlendi. Bul týraly óńir ákimdiginiń resmı saıtynda habarlandy.
««ArselorMıttal Temirtaý» AQ kómir departamenti shahtalar men baıytý fabrıkalarynyń, barlyq 13 kásiporynnyń damý strategııasyn ázirledi. Qujatta 2042 jylǵa deıingi kezeń qamtylǵan», - delingen aqparatta.
Máselen, 2020-2041 jyldarǵa kómir óndirý jobalaryn ázirleý boıynsha tehnıkalyq tapsyrma «Qaraǵandygıproshaht» JShS ınstıtýtyna berildi. Al 2019-2023 jylǵy strategııada kómir óndirisin 10% (2018 jylǵy deńgeıge qaraǵanda) jáne uńǵylaýdy 20% arttyrý kózdelgen.
«Jańa tehnologııalardy damytý, jabdyqtardy jańǵyrtý, qurylystardy qaıta jańartý jumystary josparlanýda. Іri jobalardyń qatarynda «Tentek» shahtasynda jańa kletkalyq oqpan salý, Kúzembaev atyndaǵy shahtany jeldetýdi qaıta jańartý, sondaı-aq «Vostochnaıa» OBF qaldyq qoımasynyń ekinshi kezegin salý jumysy bar. Kómir departamentiniń barlyq shahtalarynda jaıǵastyrý júıesi engizilýi tıis. Ol óndiriste avtomattandyrylǵan jáne sandyq baqylaý ádisterin damytýdy, taý-ken shahtalyq jabdyqtardy jańǵyrtýdy kózdeıdi. Mundaı júıe «Qazaqstan» shahtasynda synaldy», - delingen ákimdik málimetinde.
Atap ótilgendeı, strategııany oryndaý kenshilerdiń turaqty jumysyn qamtamasyz etedi jáne jerasty eńbeginiń qaýipsizdigin arttyrady.
