Qaraǵandy oblysy Ǵ. Mustafın kentinde sý tasqynynan zardap shekkenderge alǵashqy eki úı tapsyryldy (FOTO)
QARAǴANDY. QazAqparat - Sý tasqynynan zardap shekken Qaraǵandy oblysy Buqar-jyraý aýdany Ǵ. Mustafın kentinde qaıta salynǵan eki úı paıdalanýǵa berildi, dep habarlady «QazAqparat» HAA tilshisi.
«Eger turǵyndardy qýantqan qurylys jaıly aıtar bolsaq, úı óte sapaly salynǵan. 5 mamyrda bastalǵan qurylys aıǵa jetpeı tapsyryldy. Soǵan qýanyshtymyz. Qalǵan merdigerler de osy qarqynmen jumys istese, kúzge deıin úısiz qalǵandar qutty mekenderine qonystanyp úlgerse, tamasha bolar edi», - dedi Qaraǵandy oblysynyń ákimi N. Ábdibekov qurylys barysymen tanysý barysynda.
Qalǵan úıler kezeń-kezeńmen salynyp jatyr. Bılik 1 qyrkúıekke deıin barlyq zardap shekkenderdi jańa úımen qamtamasyz etýge ýáde berip otyr.
«Turǵyn úı nysandaryn salýǵa 6 mlrd. teńgeden astam qarajat talap etiledi. Búginde respýblıkalyq bıýdjetten 1 mlrd teńge bólindi. Budan basqa, qarjylandyrý qaǵıdalaryna sáıkes barlyq qujattar daıyndalýy tıis. 150-den astam jobalaý-smetalyq qujattama memlekettik saraptamaǵa jiberildi. Sodan keıin respýblıkalyq bıýdjetten qosymsha qarjy alatyn bolamyz», - dep habarlady jýrnalısterge bergen suhbatynda óńir basshysy.
Ol qurylysqa qajetti qarjy tolyqtaı shildede túsýi tıis dep boljaıdy. «Taǵy 2-3 transh bolady dep oılaımyn», - dep qosty N. Ábdibekov.
Budan basqa, qoǵamdyq qor qarajatynan qujattary joq 45 úı qurylysyn qarjylandyrý josparlanýda.
Qurylysshylardyń aıtýynsha, 1 úı 17 kúnde salynsa, ekinshisi 27 kúnde salynǵan. Jumystar merdigerlik uıymdardyń jeke qarajatymen júrgizildi. Aldyn ala derekter boıynsha shyǵyn 14-17 mln. teńgeni qurady.
«Árıne, qysqa merzimde osyndaı úıge kirýimiz qatty qýantty. Tipti sene almaı turmyz. Qıynshylyqta qol ushyn bergenderge alǵysymyz sheksiz. Buryn saman úı edi, endi barlyq jaǵdaımen sapaly úıde turatyn boldyq», dedi kent turǵyny ıÝ. Malysheva.
Ǵ. Mustafın kentinde, kórshi Nura stansasynda sý tasqyny 206 úıdi basty. Olar apatty dep tanyldy. Oblysta apatty sý tasqynynan keıin 391 úı salý qajet bolatyn.
Eske sala keteıik, Qaraǵandy oblysynda sý tasqyny kezinde 51 eldimekendi sý basty. 2100 úı sý astynda qaldy. Zardap shekkenderge 719,5 mln. teńge shyǵynnyń orny toltyryldy. Ókimet oryndarynyń aıtýynsha, ótemaqyny 1700-den astam otbasy alǵan.
