Qaraǵandy oblysy Erkindik aýylynda túıneme saldarynan tótenshe jaǵdaı rejimi jarııalandy
QARAǴANDY. QazAqparat - Turǵyndary túıneme juqtyrǵan Qaraǵandy oblysy Shet aýdany Erkindik aýylynda TJ rejimi engizildi. Bul týraly Qaraǵandy oblysy ákiminiń orynbasary Shagýrashıd Mamalınov málimdedi.
«Keshe keshke TJ rejimi jarııalanyp, ádilet organdarynda tirkeldi. Qazirgi sátte Erkindik aýylyna barýǵa tyıym salyndy. Jol polıtsııasynyń posttary úsh baǵytqa qoıyldy. Aýylǵa shyǵyp-kirýge tyıym salyndy», - dedi Sh. Mamalınov baspasóz máslıhatynda.
Ol Shet aýdanyndaǵy jaǵdaı baqylaýǵa alynǵany atap ótti. Erkindik aýylynda veterınarlyq mamandar men dárigerler toby jumys atqarýda. «Barlyǵy óz nusqaýlyǵy boıynsha jumys isteýde», - dep atap ótti oblys ákiminiń orynbasary.
Ol sondaı-aq TJ faktisi boıynsha QR QK 327-baby 1-bólimi boıynsha sot aldy tergeý qozǵalǵanyn atap ótti.
Baspasóz máslıhatynda soıylǵan aýrý sıyr etiniń alǵashqy synamasynyń nátıjesimen «túıneme» rastalǵany habarlandy. Endi Ulttyq veterınarııa referenttik ortalyǵynan nátıje kútilýde.
Qaraǵandy oblysy densaýlyq saqtaý basqarmasynyń málimetine sáıkes 19-21 maýsymda oblystyq ınvektsııalyq aýrýhanasyna túıneme juqtyrdy degen kúdikpen 8 adam jatqyzyldy. Onyń ishinde 10 jastaǵy bala bar. Eki adam - 33 jastaǵy áıel men 49 jastaǵy er adam qaıtys boldy. Olardyń barlyǵy Shet aýdany Erkindik aýylynyń turǵyndary.
