Qaraǵandy oblysy: emhanalar 12 mlrd teńgeden astam somaǵa dári-dármek pen medbuıymdar satyp alady
2021 jylǵa arnalǵan ótinim boıynsha medıtsınalyq uıymdar tegin medıtsınalyq kómektiń kepildik berilgen kólemine kiretin aýrýlar boıynsha 10,1 mlrd teńgege dári-dármekter men medıtsınalyq buıymdardy satyp alady, ıaǵnı bul áleýmettik mańyzy bar jáne sozylmaly aýrýlarmen esepte turǵan patsıentterge arnalǵan preparattar. Bir jyl ishinde bul soma sozylmaly nemese áleýmettik mańyzy bar aýrýlary bar jańa patsıentterdiń anyqtalýyna jáne skrınıngtik tekserýler nátıjeleri boıynsha olardy emhanada dınamıkalyq baqylaýǵa alýyna qaraı ulǵaıtylýy múmkin.
2021 jyly medıtsınalyq uıymdar MÁMS paketine kiretin aýrýlar boıynsha eresek turǵyndarǵa 1,3 mlrd teńgege jýyq dári-dármek satyp alady, ótken jylmen salystyrǵanda bul soma 194% - ǵa ósti. MÁMS paketine kiretin aýrýlar boıynsha 18 jasqa deıingi balalarǵa arnalǵan dári-dármekterge taǵy 1,4 mlrd teńge jumsalady, bul 2020 jylmen salystyrǵanda 10 ese kóp.
«Ótken jyldan bastap MÁMS paketine buryn tegin dári-dármekter qarastyrylmaǵan aýrýlar kirdi. Qazir dári-dármekterdi dıýshenniń bulshyqet dıstrofııasy, bas súıek nervteriniń zaqymdanýy, Altsgeımer aýrýy, allergııalyq rınıt, glaýkoma, endometrıoz jáne basqa dıagnozdary bar saqtandyrylǵan patsıentter ala alady. TMKKK jáne MÁMS paketteri aıasynda barlyǵy 141 aýrý túrleri boıynsha dári - dármekpen qamtamasyz etý qarastyrylǵan», - dep túsindirdi Áleýmettik medıtsınalyq saqtandyrý qory Qaraǵandy fılıalynyń bas sarapshysy Janar Rakısheva.
Aıta ketý kerek, 2020 jyly oblystyń medıtsınalyq uıymdary 12,9 mlrd teńgege tegin dári-dármek alýǵa retsept jazyp berdi. Qarajattyń kóp bóligi qant dıabetimen aýyratyn naýqastarǵa arnalǵan dárilerge - 12,5% jáne onkologııalyq aýrýlarǵa - 9% baǵyttalǵan.
