Qaraǵandy oblysy: Dónerden jappaı ýlanýdan keıin qylmystyq is qozǵaldy
QARAǴANDY. QazAqparat - Qaraǵandy oblysynda dónerlerden jappaı ýlaný faktisi boıynsha qylmystyq is qozǵaldy, dep habarlaıdy «QazAqparat» HAA tilshisi.
Aımaqtyq ІІD baıandaǵanyndaı atalǵan fakti boıynsha QR QK 304-babynyń 1-bólimimen («Abaısyzda adamdardyń jappaı aýyrýy nemese ýlanýyna ákelip soqtyrǵan sanıtarlyq erejeler men gıgıenalyq normatıvterdi buzý») qylmystyq is qozǵaldy.
Eske sala keteıik, 22-24 qazan kúnderi aralyǵynda Abaı qalasynda 12 adam medıtsınalyq kómekke júgingen, sonyń ishinde 8 adam (arasynda bir bala) aýrýhanaǵa jatqyzyldy.
Qaraǵandy oblysy Densaýlyq saqtaý basqarmasynyń baspasóz hatshysy Aıjan Isanyń aıtýynsha, búginde aýyr jaǵdaıdaǵy naýqastar joq, báriniń jaǵdaıy qanaǵattanarlyq. Olarǵa tıisti medıtsınalyq kómek kórsetilýde.
Aıta keteıik, buǵan deıin Abaı qalasynda 12 adam ýlanyp qalǵany týraly habarlaǵan bolatynbyz.
