Qaraǵandy oblysy: Bıyl Molodejnyı kentine deıingi jol jóndeledi

QARAǴANDY. QAZAQPARAT - Osakarov turǵyndary aýdan ákiminiń halyq aldynda esep berý kezdesýinde bıylǵy jyly bılik basyndaǵylar qandaı ózekti máselelerdi sheshetini týraly bildi, dep habarlaıdy QazAqparat tilshisi.

Aýdan ákimi Nurken Qobjanov bıyl «Osakarov - Molodejnyı» avtojoly jóndeletinin aıtyp, turǵyndardy bir qýantty. Tozyǵy jetken jolmen júrý jergilikti halyq úshin qıynǵa soǵyp, bılik ókilderinen sol aralyqty jóndeýdi ótingen bolatyn. Osy jyly avtojoldyń jóndeý jumystaryna 1 mlrd teńgeden astam qarajat bólingen.

Ákim kent ishindegi kóshe arasyndaǵy joldardyń jóndeletini týraly da toqtala ketti. Onyń aıtýynsha, 50 mln teńge qarjy aýdan ortalyǵynyń úsh kóshesin jaqsartýǵa jumsalady.

Nurken Qobjanov ótken jyly bıýdjettik qarjy esebinen Senokosnoe, Trýdovoe, Mırnoe, Zvezdnoe aýyldaryna barar joldar qalypqa keltirilgenin eske saldy.

Basty nazarda, sonymen qatar, Molodejnyı kentindegi jylýmen qamtý máselesi bolyp otyr. «2018 jyly kenttiń eki qazandyǵy jóndeýden ótkizildi. Bıyl №7 qazandyq pen jylý qubyrlaryna aǵymdaǵy jóndeýler júrgizý úshin qarajat qarastyryldy»,- deıdi aýdan ákimi.

Kelesi ózekti másele - sapaly aýyz sýmen qamtý. Ákimniń málimetinshe, bıyl Osakarov kenti, Esil aýyly jáne Shoqaı stansasyndaǵy sý qubyrlaryn qalypqa keltirýge 390,1 mln teńge bólindi. Taǵy bes joba boıynsha smetalar qurylady.

«Toǵyz eldi mekendegi mektepterdi jóndeýge 191 mln teńge bólingen. Balalar qaýipsizdigin eskere kele, Elbasy barlyq oqý oryndaryn beınebaqylaý júıesimen qamtýdy tapsyrǵan bolatyn. Jergilikti bıýdjette bul maqsattarǵa 7 mln teńge qarastyryldy. Taǵy 6 mln teńge mektep janyndaǵy ınternattarǵa kúrdeli jóndeýden soń jańa jıhaz ben turmystyq tehnıka satyp alýǵa bólinedi. Múmkindigi shekteýli balalarǵa arnalǵan túzeý kabınetterine qajetti jabdyqtar satyp alynady», - dep málimdedi Nurken Qobjanov.

Onyń aıtýynsha, aýdannyń alty aýylynda bıyl jańa bas josparlar qurylady.