Qaraǵandy oblysy bir aıda saqtandyrý qoryna 729 mln teńgeden astam qarjy aýdardy
QARAǴANDY. QazAqparat – 2019 jyldyń qyrkúıek aıynda Qaraǵandy oblysy medıtsınalyq saqtandyrý qoryna 729 mln teńgeden astam qarjy aýdardy, dep habarlaıdy QazAqparat tilshisi.
Bul somanyń 1 mln-nan astamy biryńǵaı jıyntyq tólem (BJT) jasaıtyndar, ıaǵnı ózin-ózi jumyspen qamtyǵandar, frılanserler, úı sharýasyndaǵy áıelder tóledi. Qalǵan qarajat - jumys berýshilerdiń óz qyzmetkerleri úshin jasaǵan aýdarymdary. El boıynsha qyrkúıek aıynda medıtsınalyq saqtandyrý qoryna túsken túsim 9,3 mlrd teńgeni qurady.
«Mindetti áleýmettik medıtsınalyq saqtandyrýǵa (MÁMS) túsken barlyq qarajat senimgerlik basqarý sharty jasalǵan Ulttyq bankte saqtalady. Keıinnen MÁMS aıasynda kórsetiletin qyzmetterdi tóleýge jiberiledi», - dep túsindirdi Qaraǵandy oblysy boıynsha medıtsınalyq saqtandyrý qorynyń fılıalynyń dırektory Fazyl Kopobaev.
