Qaraǵandy oblysy bıdaı men kartop eksportyn ulǵaıtty
QARAǴANDY. QazAqparat - Qaraǵandy oblysynda 2018-shi jyly aýyl sharýashylyq ónimderiniń eksporty 211 myń tonna kóleminde josparlanyp otyr. Ol jaıly oblys ákimdiginde ótken apparattyq jınalysta Aýyl sharýashylyǵy basqarmasy basshysynyń mindetin atqarýshy Saǵynjan Alaqashov málim etti, dep habarlaıdy oblys ákimdiginiń resmı saıty.
Ol aımaqtaǵy 2017-2021 jyldarǵa arnalǵan AÓK damytý memlekettik baǵdarlamasynyń júzege asyrylý kórsetkishteri týraly esep berdi.
- 2017-shi jyly aýyl sharýashylyǵy ónimderiniń jáne qaıta óńdeýden ótetin ónimniń eksporty 40,8 mln AQSh dollaryn, 190 myń tonnany qurady. Bıdaı men meslın (bıdaı men qarabıdaı qospasy) eksportynyń kólemi eki esedeı ulǵaıdy: 4 mln AQSh dollaryn quraıtyn 40 myń tonnaǵa jýyq ónim eksporttaldy. Kartop eksporty 3,4 ese ulǵaıdy - 3 mln AQSh dollarynan astam qarajatqa, 10 myń tonnaǵa deıin, - dep habarlady Saǵynjan Alaqashov.
Qaraǵandy oblysy shet elge taýyq jumyrtqasyn, margarın, makaron ónimderin shyǵarady. Bul ónimderdiń eksporty da ósti.
Ótken jyly oblys agrarshylary 646 myń tonna bıdaı, 322,5 myń tonna kartop jınady. Jumyrtqa óndirisi 630 mln danany qurady.
2018-shi jyly oblysta 908 myń ga jerge jazǵy daqyldar egý josparlanyp otyr. Ótken jylmen salystyrǵanda egiletin alqaptar 55,6 gektarǵa keńeıtiledi. Boljam boıynsha bıdaı men kartop ósirý 2%-ǵa, jumyrtqa - 3%-ǵa ósedi.
Oblys ákimi Elbasynyń alǵa qoıǵan mindetteriniń biri AÓK damytý boıynsha tapsyrmalar jaıly eske saldy. Bes jyl aralyǵynda aýyl sharýashylyǵy salasyndaǵy eńbek ónimdiligin 2,5 esege ulǵaıtý kerek.
- Barlyq kórsetkishterdi taǵy bir márte saraptap shyǵyńyzdar. Barlyq maqsatty ındıkatorlarǵa qol jetkizý boıynsha naqty jospar qurý qajet, - dep tapsyrdy Erlan Qoshanov.
