Qaraǵandy oblysy: Barlyq kásiporyn kúsheıtilgen sanıtarlyq rejımge kóshti
QARAǴANDY. QazAqparat - Qaraǵandy oblysynyń ákimi Jeńis Qasymbek aımaqtyń iri kásiporyndarynyń basshylarymen onlaın-keńes ótkizdi. Taqyryby – sanıtarlyq-epıdemıologııalyq talaptardyń saqtalýyn baqylaý jáne óndiriste COVID-19 taralýynyń aldyn alý, dep habarlaıdy QazAqparat tilshisi.
«Nurqazǵan» kenishiniń qyzmetkerleri arasynda koronavırýs ınfektsııasynyń órshýi aımaq bıliginiń alańdaýshylyǵyn týdyrdy.
«Kenishtegi jaǵdaı sanaýly kún ishinde búkil oblystaǵy ahýaldy órshitip jibergenin kórip otyrsyzdar. Qazir kenish jumysy toqtatyldy. Biraq bizde jumysyn toqtatýǵa bolmaıtyn kásiporyndar bar. Sondyqtan sanıtarlyq-epıdemıologııalyq normalardyń saqtalýyn muqııat qadaǵalaý kerek. Densaýlyq saqtaý basqarmasy men bas sanıtarlyq dáriger beretin usynystardy eskerý qajet», - dedi Jeńis Qasymbek.
Aıta ketsek, Qaraǵandy oblysynyń barlyq kásiporyndary kúsheıtilgen sanıtarlyq tártipke kóshti. Jumysshylar maskalarmen jáne qolǵaptarmen qamtamasyz etilýde, ǵımarattar antıseptıkalyq eritindilermen óńdelip, jeke zattarǵa arnalǵan shkaftar keminde bir jarym metr araqashyqtyqta ornalastyrylýda.
Zaýyttarda ashanalardyń jumysy da ózgerdi. Kezek qalyptastyrmaý úshin olardyń keıbirinde óz-ózine qyzmet kórsetý rejımi alynyp tastaldy. Keıbir mekemelerde ashanadaǵy túski as lanchbokspen almastyryldy.
Óńirdiń barlyq kásipornynda kezekshilik bastalar aldynda barlyq jumysshynyń temperatýrasy ólshenedi. Bul talaptar merdigerlerge de qatysty. Mysaly, «GRES-Topar» JShS-da COVID-19 ınfektsııasyna PTR-analız tapsyrý talap etiledi.
«Rezervtik jospar retinde kazarmalyq rejımge kóshýdi qarastyramyz. Jumysty bizge eshbir jaǵdaıda toqtatýǵa bolmaıdy. Sondyqtan, qajet bolǵan jaǵdaıda, qyzmetkerler jumystan soń úılerine qaıtpaı, arnaıy qarastyrylǵan úı-jaılarǵa ornalastyrylady. Mundaı sharalar ınfektsııanyń taralýyn toqtatýǵa jáne baılanysqa túsýshiler sanyn qysqartýǵa kómektesedi», - dep habarlady «GRES Topar» JShS dırektory Evgenıı Nıkıtın.
Kásiporyn basshylary óz mamandaryn KVI-ǵa testileýden ótkizýge erekshe mán berip otyr. «ArselorMıttal Temirtaý» AQ PTR-taldaý júrgizý úshin «Olımp» klınıkalyq-dıagnostıkalyq zerthanasymen shart jasasty.
«Qazir biz úshin erekshe másele – qyzmetkerlerdiń jumys oryndaryna kelýin, olardyń shahtaǵa ketýin jáne túsýin baqylaý. Atap aıtqanda, bul – áleýmettik qashyqtyqty saqtaý, maskalyq rejım, kólik pen úı-jaılardy dezınfektsııalaý. Munyń bári bizde saqtalady, biraq qyzmetkerlerge únemi baqylaý men nusqaý jasap otyrý qajet», - dedi «ArselorMıttal Temirtaý» AQ Kómir departamentiniń dırektory Andreı Chernomaz.
Jeńis Qasymbek kásiporyndarda koronavırýs ınfektsııasynyń taralýynyń aldyn alýdy erekshe muqııat júrgizýdi, sondaı-aq aýrý qaıtalanǵan jaǵdaıǵa jumys josparyn oılastyrýdy tapsyrdy. Mamandardyń boljamynsha, indettiń ekinshi tolqyny bıylǵy qyrkúıek-qazan aılarynda bolýy múmkin.
Sondaı-aq, aımaq basshysy Qaraǵandy oblystyq Densaýlyq saqtaý basqarmasynyń basshysy Erjan Nurlybaevqa Mindetti medıtsınalyq saqtandyrý qorynan qala quraýshy kásiporyndardyń qyzmetkerleri úshin COVID-19 skrınıngterin qarjylandyrý múmkindigin qarastyrýdy tapsyrdy.
