Qaraǵandy oblysy: Avtobýs pen júk kóligi soqtyǵysyp, 27 adam aýrýhanaǵa tústi
QARAǴANDY. QazAqparat - Óńirlik densaýlyq saqtaý basqarmasy Qaraǵandy oblysynda avtobýs pen júk kóliginiń soqtyǵysýynan zardap shekkenderdiń jaǵdaıy týraly aıtty, dep habarlaıdy QazAqparat tilshisi.
«Barlyǵy 27 adam jetkizildi. Zardap shekkenderdiń ishinde 10 adam aýrýhanaǵa jatqyzyldy. Olardyń barlyǵy Qaraǵandy qalasyndaǵy túrli klınıkalarda em alyp jatyr. Úsheýi - №1 qalalyq aýrýhananyń jansaqtaý bóliminde. Olardyń jaǵdaıy birqalypty aýyr dep baǵalanýda. Naýqastardyń biri qalalyq aýrýhananyń stantsıonarynda em qabyldaýda. Tórteýi Maqajanov atyndaǵy klınıkanyń palatasynda jatyr. Júkti áıel men 12 jastaǵy bala dınamıkalyq palatada. Taıaý kúnderi jazylyp shyǵýy múmkin. Zardap shekkender ártúrli jaraqat alǵan. Olardyń jambastary, muryndary synǵan. Barlyq qajetti medıtsınalyq kómek kórsetilýde», - dedi Qaraǵandy oblystyq densaýlyq saqtaý basqarmasynyń baspasóz hatshysy Aıjan Isa.
Eske salaıyq, 21 qarashada saǵat 08:00-de Qaraǵandy oblysy Buqar jyraý aýdanynda «Qyzylorda-Pavlodar» tasjolynyń 982 shaqyrymynda «Qýshoqy aýyly-Qaraǵandy» baǵytynda qatynaıtyn jolaýshylar avtobýsy men júk kóligi soqtyǵysqan edi. Apat kezinde salonda 45 adam bolǵan.
