Qaraǵandy oblysy: Aýyldarda qoqys suryptaý mádenıeti engizilmek
QARAǴANDY. QazAqparat - Qaraǵandy oblysy Osakarov aýdanynda qaıtalama shıkizatty qabyldaý beketi men turmystyq qatty qaldyqtar polıgonynda jyljymaly suryptaý keshenin ornatý usynyldy, dep habarlaıdy QazAqparat tilshisi.
Osakarov aýdanynyń turǵyndary qoqys tapsyrǵany úshin aqsha ala alady. Aýdandyq ákimdikte kásipkerlikti qoldaý jónindegi konsýltatıvti-keńes berý organynyń otyrysynda turmystyq qatty qaldyqtardy óndirý jáne suryptaý jobasy tanystyryldy.
«Qazaqstanda qoqysty bólek jınaýdy júzege asyrý jospary ázirlendi. Alaıda turǵyndar qaldyqtardy suryptaýdyń qandaı paıdasy bar ekenin áli de bilmeıdi. Bizdiń kompanııanyń mindeti - bul mádenıetti nasıhattaý», - dedi Temirtaý qalasynyń kásipkeri Álisher Aıdarov.
Ol Osakarov kentinde qaıtalama shıkizatty qabyldaý beketin ashýdy jáne TQQ polıgonynda jyljymaly suryptaý keshenin ornatýdy usyndy. Kásipker suryptalǵan qoqysty tapsyrǵany úshin aýyl turǵyndaryna aqsha beriletinin atap ótti. Praıs paraqshalar qaldyqtardy qabyldaý oryndarynda ornalastyrylady.
Jobany mamyr aıynda iske qosý josparlanyp otyr. Kásiporyn túrli qaldyqtardy qabyldaıdy: qaǵaz, plastık, metall, aýyl sharýashylyǵy taýarlaryn óndirýshiler paıdalanǵan hımııalyq tyńaıtqyshtar men otyn.
Keńes jas kásipkerdiń ıdeıasyn qoldady. Jergilikti bılik qajetti kómekti kórsetýge ýáde berdi. Qaıtalama shıkizatty qabyldaý pýnktileri tek aýdan ortalyǵynda ǵana emes, Molodejnyı kentinde, sondaı-aq aýdannyń aýyldyq okrýgterinde paıda bolady.
Jobany iske asyrý arqyly ekologııa jaqsarady jáne aýylda jańa jumys oryndary ashylady.
Jobanyń bastamashylary aýyl turǵyndarynyń qatysýymen áleýmettik jelilerde ekologııalyq chellendjdi iske qosýdy kózdep otyr. Qazirgi tańda aýdan oqýshylary eko-qozǵalys qataryna qosyldy. Olar «EKO býyn» kórmesinde óz ıdeıalaryn usyndy.
