Qaraǵandy oblysy aýmaǵynda kóktaıǵaqqa baılanysty jabylǵan joldardyń birqatar baǵyttary búgin ashyldy
ASTANA. 3 qańtar. QazAqparat /Rýslan Ǵabbasov/ - Qaraǵandy oblysy aýmaǵynda kóktaıǵaqqa baılanysty jabylǵan joldardyń birqatar baǵyttarynda kólik qozǵalysy búgin qalypty rejımge kóshirildi.
Bul týraly búgin «Qazaqavtojol» RMK -nyń baspasóz qyzmeti habarlady. 2 qańtarda keshqurym Qaraǵandy oblysy boıynsha aýa raıynyń qolaısyz jaǵdaıyna baılanysty (jańbyr aralas qar, azdaǵan kóktaıǵaq) qoǵamdyq jáne júk avtokólikteriniń qozǵalysyna shekteý qoıyldy. Atap aıtqanda, bul shekteý Jambyl, Qyzylorda, Pavlodar, Shyǵys Qazaqstan oblystary jáne de Astana, Almaty, Jezqazǵan qalalary baǵyttary boıynsha belgilendi.
3 qańtarda saǵat 09:30-da atalǵan joldarda kólik qozǵalysy qalypty rejımge kóshirildi, al Aqsý-Aıýly jáne Balqash qalasy baǵytyndaǵy joldar áli de jabyq. «Qazaqavtojol» RMK -nyń qar tazalaý tehnıkalary 2 qańtardan bastap respýblıkalyq mańyzy bar osy joldardy qardan tazalap, kóktaıǵaqqa qarsy materıaldardy tóseý jumystaryn atqarýda.
