Qaraǵandy oblysy ákiminiń burynǵy orynbasary ustaldy

ASTANA. QazAqparat - Sybaılas jemqorlyqqa qatysy bar degen kúdikpen Qaraǵandy oblysy ákiminiń burynǵy orynbasary ustaldy. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń qoǵammen baılanys jónindegi departamentiniń dırektory Arman Berdalın málim etti, dep habarlaıdy QazAqparat tilshisi.

«Sybaılas jemqorlyqqa qarsy kúres Ulttyq bıýrosy Qaraǵandy oblysy ákiminiń burynǵy orynbasaryna qatysty sotqa deıingi tergeý amaldaryn júrgizýde. Ol oblystyń jumyspen qamtý jáne áleýmettik baǵdarlamalardy úılestirý basqarmasynyń laýazymdy tulǵalarymen aldyn ala sóz baılasý arqyly adamdar tobynda oblystyń múmkindigi shekteýli adamdaryn arnaıy qatynas kólikterimen qamtamasyz etýge bólingen 36 mln teńgeden astam somadaǵy bıýdjet qarajatyn jymqyrdy degen kúdikke ilinip otyr», - dedi Agenttikte ótken baspasóz máslıhatynda Arman Berdalın.

Onyń aıtýynsha, atap aıtqanda, tehnıkalyq sıpattamaǵa sáıkes kelmeıtin jáne kóterińki baǵada múmkindigi shekteýli adamdarǵa arnalǵan kreslo-arbalaryn jetkizý boıynsha qylmystyq is qozǵalyp otyr. Sot sanktsııasymen kúdiktige jáne onyń úsh sybaılasyna qatysty kúzetpen ustaý túrindegi bultartpaý sharasy qoldanylǵan. Tergeý jalǵasýda.