Qaraǵandy oblysy ákimdiginde kóktemgi sý tasqynyna qatysty jaǵdaı talqylandy
ASTANA. QazAqparat - Qaraǵandy oblystyq ákimdiginde ótken apparattyq jınalys barysynda aımaqtaǵy kóktemgi sý tasqynyna qatysty jaǵdaıy taqylandy, dep habarlaıdy QazAqparat Qaraǵandy oblysy ákimdiginiń baspasóz qyzmetine silteme jasap.
Baspasóz málimetterine qaraǵanda, jıynda ózenderindegi sý deńgeıi kóterilip, joldardy sý basqan aýdandardyń máselesi qaraldy.
«Jalpy oblysta kóktemgi sý tasqynyna qatysty jaǵdaı qalypty. Nura jáne Sherýbaı-Nura ózenderiniń joǵarǵy aǵysynda qaýip joq. Qaýip aýmaǵynda Nura aýdany qalyp qoıdy, biraq jaǵdaı baqylaýda. Samarqan sý qoımasynda búgingi tańda sý deńgeıi 195 mln.m3 qurap otyr, toltyrylýy - 76,7%. Jalpy jyl saıyn kóktemgi sý tasqyny jaǵdaıy erekshe baqylaýda», - dep esep berdi oblys ákiminiń orynbasary Anatolıı Shkarýpa.
Qaraǵandy oblysynyń ákimi májiliste jergilikti sıpattaǵy problemalar bar ekenin atap ótti.
«Shopa ózeninde sý deńgeıi 30 santımetrge ulǵaıǵan, joldardan sý ótip jatyr. Jaqyn mańdaǵy eldi meken joldan úzilip qaldy. Bul jaǵdaı jyl saıyn qaıtalanady, jazda ol problemany sheshý qajet. Sý ótkizetin qubyrlardyń sanyn kóbeıtý kerek»-dedi oblys basshysy.
Qaraǵandy oblystyq jolaýshylar kóligi jáne avtomobıl joldary basqarmasynyń basshysy Áskerbek Haltonovtyń aıtýynsha, qashyqtyǵy 3 shaqyrym bolatyn jol uzaq ýaqyt boıy ıesiz bolǵan. Ótken jyly ol aýdannyń ıeligine berildi. Qazir jobalaýshylar sý ótkizý qabiletine qatysty sharalardy qarastyryp jatyr.
Sondaı-aq onyń aıtýynsha, búgingi tańda Shopa kentinde 149 adam turady.
«Qansha adam turatynyna qaramastan, biz ondaıǵa jol bermeýimiz qajet, mundaı jáıtter qaıtalanbaýy tıis. Osy sekildi máselelerdi ýaqytynda sheshý kerek, - dep atap ótti oblys ákimi.
Qazirgi tańda Nura aýdanynda da sý deńgeıi 4 metrge kóterilip otyr, bir sý ótkizgish qubyr julynyp ketti. Jergilikti mańyzǵa ıe Janbóbek-Bashıno jolynda sý júre bastady. Qazirgi tańda ol jerde táýlik boıy kezekshilik ornatyldy.
Erlan Qoshanov bul aýdandarda kóktemgi sý tasqyny jaǵdaıyn baqylaýda ustaýdy tapsyrdy. Anatolıı Shkarýpa oblys aýmaǵyn ushyp, aralaý barysynda anyqtalǵan problemalarǵa toqtaldy.
«Ózenderdiń arnalary kóktemgi sý tasqyny kezinde júretin sýdy ótkize almaıdy. Jol kartasyna ózenderdi tazartý sharalary engizildi. Bul maqsattarǵa jobalyq-smetalyq qujattamalar daıyndaldy, aǵymdaǵy jyly jumystar bastalady»,-dedi ol.
Esepterdi tyńdap bolǵan soń, aımaq basshysy barlyq problemalardy kidirmesten sheshýdi tapsyrdy.
«Osynyń barlyǵy jyl saıyn qaıtalanady, ol problemalardy sheshý kerek. Biz qorǵaý bógetterin saldyq, qazir olardyń nátıjesin kórip otyrmyz. Ushyp aralaý barysynda olardyń tıimdiligine kóz jetkizdik, olar eldi mekenderdi sýdan qorǵaı alady. Nelikten Shopada bıyl ondaı jumystar jasalmady? Qazir biz álsiz jerlerdi kórip otyrmyz, ózen arnalary sý jibermeı jatyr, olardy tazalaý qajet, kerek bolǵan jaǵdaıda tereńdetý jumystaryn da jasańyzdar. Bul jumystardyń barlyǵyn osy jazda atqarý qajet», - dedi Erlan Qoshanov.
