Qaraǵandy oblysy: Ákimder kópbalaly otbasylar jaǵdaıymen jeke tanysady
QARAǴANDY. QazAqparat - Qaraǵandy oblysynda qala jáne aýdan ákimderine kópbalaly otbasylardyń jaǵdaıyn bilý úshin aýlalardy aralap shyǵý tapsyryldy, dep habarlaıdy QazAqparat tilshisi.
Qaraǵandy oblysynyń ákimi Erlan Qoshanov áleýmettik máselelerge qatysty tapsyrmalar berdi. Óńir basshysynyń pikirinshe, árbir ákim óziniń aýmaǵyndaǵy turǵyndardyń problemalarymen jeke tanys bolýy tıis.
«Barlyq ákimder kópbalaly analardyń qalaı ómir súretinin bilý úshin aýlalardy aralap shyǵýy kerek. Olarmen betpe-bet júzdesip, qandaı kómek qajet ekenin bilińizder», - dedi oblys ákimi.
Aımaq basshysy jumyspen qamtý salasyndaǵy áreketterdi kúsheıtýdi talap etti. Ol jumys berýshilermen bolatyn shıelenisterdiń der kezinde aldyn alý úshin eńbek qatynastaryn baqylap otyrýǵa shaqyrdy.
«Baqylaýshy jáne qazynalyq organdarmen birlesip qaýipterdi basqarý júıesin ázirleý qajet», - dep atap ótti Erlan Qoshanov.
Óńir basshysy kadrlardyń suranysqa ıe bolýyna da basa nazar aýdardy. Ol kolledj túlekterin jumysqa ornalastyrý boıynsha tolyq taldaý jasaýdy tapsyrdy. Bul rette oblys ákimi dýaldy oqytý júıesin damytý qajet dep esepteıdi.
