Qaraǵandy oblysy Abaı aýdanynda bıyl 160-tan astam otbasy baspanaly bolady
QARAǴANDY. QazAqparat – Qaraǵandy oblysynyń Abaı qalasynda aýla aýmaqtaryn abattandyrý boıynsha belsendi jumystar júrip jatyr. Zamanaýı balalar jáne sport alańdary ornatylyp, turǵyn úıler salynýda, dep habarlaıdy QazAqparat tilshisi.
Qaraǵandy oblysynyń ákimi Jeńis Qasymbek Abaı aýdanyna jumys sapary barysynda qalany abattandyrý jumystarymen tanysyp, sharýa qojalyqtardyń tynys tirshiligimen tanysty.
Óńir basshysy birneshe úı ornalasqan aýlalardyń birinde boldy. Jaqynda aýmaq retke keltirildi. Turǵyndar bul ózgeristerdi birneshe jyl boıy kútken bolatyn. Jergilikti bılik oıyn alańdaryn ornatyp qana qoımaı, joldyń bir bóligin keńeıtip, asfalt tósep, jol tósemderinen jaıaý júrginshiler joldaryn jasady.
«Bıyl qalada 6 aýla abattandyryldy. 2025 jylǵa deıin biz jylyna 5-6 aýlany abattandyramyz. Sondaı-aq, bıyl biz 8 shaqyrymnan astam joldy jóndedik. Tórt úlken kóshege asfalt tóselip, jeke sektordyń 10 kóshesine jol tóseldi», – dedi Abaı qalasynyń ákimi Medeý Ahmetov.
Oblys ákimi óz kezeginde abattandyrylatyn aýlalar sanyn arttyrýdy tapsyrdy.
«Retke keltirilýi tıis aýlalar az qaldy. Abattandyrylatyn aýlalardyń úlesin jyl saıyn 10-ǵa deıin jetkizińizder», – dedi Jeńis Qasymbek.
Sondaı-aq, oblys basshysy jergilikti turǵyndardyń ótinishi boıynsha turǵyn úı kommýnaldyq jańǵyrtý baǵdarlamasy aıasynda úılerdiń birin jóndeýdi bastaýdy tapsyrdy. Adamdar ol baǵdarlamaǵa qatysyp, úıleriniń shatyryn jóndemekshi.
Ákim Abaı aýdanynyń qurylys alańdaryn da qarap shyqty. Jeńis dańǵylynda jeke ınvestıtsııalar esebinen 5 qabatty turǵyn úı salynýda. Qurylys salýshy 2022 jyly 45 páterdi paıdalanýǵa berýdi josparlap otyr.
Bıylǵy jyly 168 otbasy páter kiltterin alady. Olardyń 18-i jaqynda baspanaly boldy. Olarǵa páterler Topar kentinen bólindi.
Jeńis Qasymbek aýdandaǵy egin jınaý naýqanynyń barysymen de tanysty. Kóksý aýyldyq okrýginde «Astra-Agro LTD» JShS jáne «Shans» sharýa qojalyǵynda boldy.
«Astra-Agro LTD» JShS – kartop tuqymynyń orıgınatory mártebesine ıe Qazaqstandaǵy jalǵyz kompanııa. Bıyl fermerler eksportqa 2 myń tonnaǵa jýyq elıtalyq tuqym jiberdi.
Abaı aýdanynyń ákimi Baýyrjan Asanovtyń aıtýynsha, bıyl astyq jınaý alqaby 40 myń gektardy, kartop – 5 902 gektardy, kókónis – 1 001 gektardy quraıdy.
«Abaı aýdany Qaraǵandy oblysy kóleminde 52,5% kartop jáne 61,9% kókónis óndiredi. Egin jınaý naýqanyna 108 astyq jınaıtyn kombaın tartylǵan. Kartop jınaýǵa 20 kombaın men 25 jer qazatyn tehnıka qatysady», – dep atap ótti ol.
Aýyl sharýashylyǵy taýaryn óndirýshilerge 2 500 tonna arzandatylǵan dızel otyny bólindi.
Aýdanda 44 jemis-kókónis qoımasy jáne 24 astyq qoımasy bar.
Abaı aýdanynda jeti ınvestıtsııalyq joba júzege asyrylýda. Osylaısha, «Astra-Agro LTD» kompanııasy 500 basqa arnalǵan taýarly sút fermasyn salady. Ony paıdalanýǵa berý 2023 jylǵa josparlanǵan. Munda 30 jumys ornyn qurý kózdelip otyr.
«Shans» sharýa qojalyǵy da 400 basqa arnalǵan taýarly sút fermasyn salyp jatyr. Investıtsııa esebinen munda qurama jem zaýyty salynyp, Petkus astyq tazalaý mashınasy alyndy.
Sapar sońynda Jeńis Qasymbek egin jınaý kezinde jumysty joǵary qarqynda ustap turýdy jáne qurylys jumystarynyń sapasyn baqylaýdy tapsyrdy.
