Qaraǵandy oblysy Abaı aýdany ákiminiń burynǵy orynbasaryna sybaılas jemqorlyǵy úshin 4 mln. teńge somasynda aıyppul salyndy
QARAǴANDY. QazAqparat - Qaraǵandy oblysynda sybaılas jemqorlyq qylmysy úshin Abaı aýdany ákiminiń burynǵy orynbasary Marat Bımaǵambetovke 4 mln. teńge kóleminde aıyppul salý jóninde úkim shyqty. Bul týraly oblystyq sottyń baspasóz qyzmeti habarlady.
«Abaı aýdandyq sotynda Abaı aýdany ákiminiń burynǵy orynbasary M.Bımaǵambetovke qatysty qylmystyq is qaraldy. Sot úkimimen ol QR QK 2-bólimi 307-babynda (ókiletti laýazym ıesiniń qyzmet babyn asyra paıdalanýy) kózdelgen sybaılas jemqorlyq qylmysy úshin aıypty dep tanyldy. Bımaǵambetovke 2000 AEK mólsherinde aıyppul túrinde jaza taǵaıyndaldy, bul 3 mln. 964 myń teńgeni quraıdy», - delingen habarlamada.
Sonymen birge burynǵy sheneýnik 3 jyl merzimge memlekettik uıymdarda qyzmet atqarý quqyǵynan aıyryldy.
«Úkim zańdy kúshine engenge deıin bultartpaý sharasy kepil túrinde burynǵysha qaldyryldy», - dep qosty oblystyq sottyń baspasóz qyzmetinde.
Budan buryn QR memlekettik qyzmet isteri jáne sybaılas jemqorlyqqa qarsy turý agenttiginiń oblystyq departamentine silteme jasap habarlanǵandaı, Abaı aýdany ákiminiń burynǵy orynbasary M. Bımaǵambetovke qatysty qylmystyq is qozǵalǵan bolatyn.
Tergeý nusqasy boıynsha, ákimniń orynbasary Abaı qalasynda úı qurylysy úshin ýchaskeni ýaqytsha jer paıdalaný quqyǵymen óziniń zaıybyna usyný jóninde zańsyz sheshim shyǵarǵan. Sonymen birge, memlekettik qyzmetshiniń qaryndasy memlekettik qordan zańsyz páter alǵan. Sybaılas jemqorlyqqa kúdikti aýdan ákiminiń orynbasary qyzmetinen bosatylǵan bolatyn.
