Qaraǵandy oblysy 2021 jyly ónerkásip óniminiń kólemin 3 trln teńgege jetkizbek
QARAǴANDY. QazAqparat - Qaraǵandy oblysynda 2021 jyly ónerkásipte úsh paıyzdyq ósim josparlanǵan, dep habarlaıdy QazAqparat Qaraǵandy oblysy ákimdiginiń resmı saıtyna silteme jasap.
Kásiporyndardyń turaqty jumysy 200 myńnan astam jumys ornyn saqtaýǵa múmkindik beredi. Qaraǵandy oblysynyń ákimi Jeńis Qasymbek onlaın rejıminde ónerkásipterdiń jumysyn baǵalaý úshin iri kompanııalardyń basshylarymen kezdesti. Óńir basshysyna ónerkásip alyptarynyń josparlary týraly aıtyldy.
- 2020 jyly qıyn jaǵdaılarǵa qaramastan oblys kásiporyndary turaqty jumys istedi. Jyl qorytyndysy boıynsha ónerkásip ónimin óndirý 1,5% ósimmen 2,9 trln teńgeni qurady. 2021 jylǵa ónim kólemi 3,2% ósimmen 3 trln teńge deńgeıinde josparlanyp otyr. Óńdeý ónerkásibinde - 3,5%-ǵa, taý-ken ónerkásibinde - 1%-ǵa oń dınamıka kútilýde, - dep habarlady ónerkásip basqarmasynyń basshysy Ǵalymjan Jumasultanov.
Onyń aıtýynsha, metallýrgııa, mashına jasaý, qurylys ındýstrııasy, hımııa ónerkásibi jáne t. b. barlyq negizgi salalarda ósim baıqalady.
«ArselorMıttal Temirtaý» AQ Bas dırektory Bıjý Naır kompanııanyń 2021 jylǵa barlyq bólimsheler boıynsha 140 mlrd teńge somasynda ınvestıtsııalar josparlaǵanyn habarlady. Metallýrgııa óndirisin jańǵyrtýǵa jumsalatyn shyǵyndar shamamen 77 mlrd teńgeni quraýy tıis. Kombınat bolat óndirisin 14,2%-ǵa - 3,8 mln tonnaǵa deıin arttyrýdy josparlap otyr.
«Qazaqmys» óndiristi jańǵyrtý jáne keńeıtý boıynsha birqatar jobany júzege asyrýda. Kompanııa bıyl ınvestıtsııany eki esege - 96,3 mlrd teńgege deıin ulǵaıtýǵa ýáde berip otyr. Mys óndirisi 344,6 myń tonna kóleminde josparlanǵan.
Jáırem taý-ken baıytý kombınatynda quny 145 mlrd teńge bolatyn iri jobany júzege asyrý aıaqtalady. Munda jylyna 5 mln tonna qorǵasyn-myrysh kenin óńdeıtin jańa baıytý fabrıkasy salynýda. Kontsentrat óndirisi shamamen 650 myń tonnany quraıdy. Jańa kásiporynda 380 jumys orny ashylady.
«Jáırem KBK» AQ Basqarma Tóraǵasy Sergeı Bartoshtyń aıtýynsha, barlyq jabdyqty montajdaý sáýir aıynda aıaqtalýy tıis, al mamyr aıynda óndiristi tolyq iske qosý josparlanýda.
YDD Corporation ferroqorytpa zaýytynda tórtinshi pesh iske qosylady. Bul kásiporynnyń qýatyn jylyna 240 myń tonnaǵa deıin arttyrýǵa múmkindik beredi.
«Altynalmas» altyn óndirý fabrıkasynyń tolyq qýatyna shyǵý kútilýde. Dolınnoe jáne Pýstynnoe ken oryndarynda 5 mln tonnaǵa deıin ken óńdelip, 5 tonna Dore qorytpasy óndiriledi.
Temirtaýdaǵy tehnıkalyq gaz óndiretin zaýyt, Saran qalasyndaǵy avtobýs zaýyty da oblys ekonomıkasy ósiminiń draıveri bolýy tıis.
- Bizdiń oblysta ekonomıkanyń 51%-y - ónerkásip. Óńirdegi áleýmettik kóńil-kúı kásiporyndardyń turaqty jumysyna baılanysty. Biz úshin mańyzdy faktorlar - bul jumys oryndaryn saqtaý, jalaqynyń ósýi, eńbek jaǵdaılaryn jaqsartý, - dep atap ótti Jeńis Qasymbek.
- Ónerkásip ujymdary shtattyq rejımde eńbek etýde. Ótken jyl qıyn boldy. Biz birge qıyndyqtardy jeńip, ómir aǵymyna ilese aldyq. Bıyl óndiris ósimin jalǵastyrý kerek. Biz ár kásiporynmen jan-jaqty jumys isteýge jáne bizge baılanysty barlyq máselelerdi sheshýge daıynbyz.
2021 jyly kem degende 700 mlrd teńge ınvestıtsııa tartý josparlanýda. 1500 jumys ornyn qurýmen 13 jańa óndiris ashylady dep kútilýde.
