Qaraǵandy oblystyq TJD-ǵa sý tasqynynyń qaýpi týraly 40-tan astam habarlama túsken
ASTANA. QazAqparat - Qaraǵandy oblystyq TJD-ǵa sý tasqynynyń qaýpi týraly 40-tan astam habarlama túsken. Qaraǵandy oblysynyń aýmaǵynda sý tasqyny kezeńi júrip jatqanyn óńirlik TJD memlekettik jáne aqparat toby habarlady.
29 naýryz kúni Qaraǵandy oblysyndaǵy ózenderde sý deńgeıiniń kóterilýi baıqaldy.
31 naýryzdaǵy saǵat 08.00-degi jaǵdaı boıynsha Qaraǵandy oblystyq TJD Biregeı kezekshilik-dıspetcherlik qyzmetine turǵyn úılerdi, aýlalyq aýmaqtardy, ártúrli mańyzdaǵy joldardyń jeke ýchaskelerindegi sý tasqyny men sý tasqynynyń qaýpi týraly 42 habarlama túsken.
Óńirlik TJD aqparaty boıynsha, 30 naýryz kúni aýa temperatýrasynyń +5+7 gradýsqa joǵarylaýyna baılanysty qardyń jappaı erip, saldarynan Aqjol bólimshesi aýmaǵyndaǵy jergilikti mańyzy bar tasjoldy sý shaıyp ketkendigi jáne erigen qar sýynyń Nurken Ábdirov aýyldyq okrýgi Jarly aýyly Jarly kóshesindegi shetki 9 úıdi basyp qalǵandyǵy týraly habarlama kelip túsken. Sý astynda qalyp qoıǵan 9 úıden 31 adam qutqarylyp, týystaryna qonystandyryldy.
Dál osyndaı jaǵdaı, 30 naýryz kúni Aqadyr kentinde de oryn alǵan. Tótenshe jaǵdaı bolǵan aýmaqqa 700 qap topyraq jetkizilip, tóseldi. Qoldanylǵan sharalardyń nátıjesinde sýdyń tasýy toqtatyldy.
