Qaraǵandy oblystyq Tekserý komıssııasyna jańa tóraǵa saılandy

 ASTANA. QazAqparat - Qaraǵandy oblysy boıynsha Tekserý komıssııasynyń tóraǵasy laýazymyna 52 jasar Aıan Ábdikárimov saılandy, dep habarlaıdy óńir basshysynyń resmı saıty.

Saılaý oblystyq máslıhattyń HІІ kezekten tys sessııasynda ótti. 

- Esep komıtetiniń usynysy boıynsha jáne QR Prezıdenti Ákimshiliginiń kelisimine saı Qaraǵandy oblysy boıynsha Tekserý komıtetiniń tóraǵasy laýazymyna Ábdikárimov Aıan Bolatulynyń kandıdatýrasyn usynýǵa ruqsat etińizder, - dedi sessııa barysynda oblystyq máslıhat hatshysy Serik Óteshov. 

 Depýtattar úmitkerdi biraýyzdan quptady. Osyǵan deıin Aıan Ábdikárimov oblystyq tekserý komıssııasynyń múshesi bolǵan. 

Esterińizge sala keteıik, oblystyq Tekserý komıssııasynyń burynǵy tóraǵasy Serik Óteshov 29 qazanda ótken saılaýda oblystyq máslıhat depýtaty bolyp saılandy. Sońyra ókildik bılik organyn basqardy. 

Aıan Ábdikárimov 2011-shi jyldyń 14 qyrkúıeginen bastap osy ýaqytqa deıin Qaraǵandy oblysy boıynsha Tekserý komıssııasynyń múshesi qyzmetin atqaryp keldi.