Qaraǵandy oblystyq shtab otyrysynda sý tasqynyna daıyndyq barysy talqylandy

QARAǴANDY. QazAqparat - Qaraǵandy oblysynyń ákimdiginde TJ komıssııasynyń jáne sý tasqyny kezeńine daıyndyq shtabynyń otyrysy ótti. Ár baǵyt boıynsha basqarmalar men vedomstvolardyń basshylary esep berdi, dep habarlaıdy QazAqparat tilshisi.

Oblys ákiminiń orynbasary Ermaǵanbet Bólekpaev jaǵdaıdyń turaqty baqylaýda ekenin atap ótti. Qazir sý tasqyny qaýpi joǵary eldi mekenderi bar barlyq aýdandar baqylanýda.

Jaqyn kúnderde sınoptıkter oblysta aýa raıy qubylmaly bolady dep boljaýda. Aıazdar men jyly aýa temperatýrasy almasyp otyrady dep kútilýde. Aýa-raıy jaǵdaıyn eskere otyryp, bıylǵy jyly sý tasqynyna daıyndyq qańtar aıynan bastap júgizile bastady.

«Ózderińiz biletindeı, oblys ákimi is-sharalar josparyna qol qoıdy. Boljamdyq derekter de bar. Sondyqtan sý tasqynynyń aldyn alý boıynsha barlyq máselelerdi aldyn ala pysyqtaý kerek», - dep atap ótti Ermaǵanbet Bólekpaev.

Dálirek gıdroboljam jasaý úshin mamandar ózen basseınderin aralap shyǵady. Oblysta 1 qańtardan bastap 8 gıdrobeket ashyldy.

Óńirde gıdroqurylystar tekserildi. Sý tasqynynyń aldyn alý boıynsha Jol kartasyn iske asyrý aıasynda Nura jáne Sherýbaı-Nura ózenderine sanatsııa júrgiziledi. Oblystyq bıýdjetten Topar bógetin kúrdeli jóndeýge qarajat bólindi.

«Qaraǵandy oblysynda úsh iri sý qoımasy bar: Keńgir, Sherýbaı-Nura jáne Samarqand. Qazirgi ýaqytta Samarqand sý qoımasynan sýdy aǵyzý esebinen Nura ózeniniń arnasyn shaıý jumystary júrgizilýde. Muz astyndaǵy sý arnany toltyrady. Bul bitelip qalý nemese basqa da kedergilerdiń aldyn alýǵa múmkindik beredi. Aqpan aıynyń 20-y kúni Sherýbaı-Nura sý qoımasynan sý aǵyzýdy bastaý josparlanyp otyr», - dep habarlady Nura-Sarysý basseındik ınspektsııasynyń basshysy Múslim Aqqojın.

Oblystyq jáne Respýblıkalyq mańyzy bar joldarda sý ótkizý qubyrlaryn tazalaý jumystary bastalady.

Oblys TJD bastyǵy Ibragım Kúlshimbaev habarlaǵandaı, qazirgi ýaqytta sý tasqynyna ushyraıtyn eldi mekenderdiń ákimderimen oqý-ádistemelik jıyn ótkiziledi. Onyń aıtýynsha, 25-shi aqpanda respýblıkalyq oqý-jattyǵý ótedi.

«Qazir bizde qar shyǵarý jumystary basym baǵyt bolyp otyr. Árbir eldi meken boıynsha naqty karta bolý kerek. Sý tasqyny kezeńiniń qaýipsiz ótýi - bul barlyq qalalar men aýdandar ákimderiniń, ýákiletti memlekettik organdardyń derbes jaýapkershiligi. Biz úılesimdi jumys isteýge tıispiz», - dedi Ermaǵanbet Bólekpaev.

Oblys ákiminiń orynbasary TJD basshylyǵyna óńirdi sý tasqyny kezeńine daıyndaý boıynsha jalpy úılestirýdi jalǵastyrýdy tapsyrdy. Sondaı-aq, jol kartasymen qarastyrylǵan is-sharalardy odan ári oryndaý boıynsha basqarma basshylary tapsyrmalar aldy.