Qaraǵandy oblystyq qan ortalyǵy donorlarǵa zárý

«Bizge barlyq túrdegi qan donorlary qajet. Donorlar 18 jastan asqan, medıtsınalyq qarsy kórsetilimi joq adamdar bola alady. Ol degenimiz júrektiń, búırektiń, baýyrdyń sozylmaly aýrýy bolmaýy kerek, bir organy joq bolsa ol adam donor bola almaıdy. Buryn juqpaly aýrýy bolǵan, mysaly gepatıt, AITV, merez, týberkýlezben aýyrǵandar da jaramaıdy. Donordyń salmaǵy 55 keliden asýy kerek. Qan tapsyrǵany úshin aqshalaı tólem mólsheri 0,25 AEK (730 teńge). Donorǵa eki kún demalys beriledi», – deıdi Oblystyq qan ortalyǵy dırektorynyń orynbasary Lázzat Sabyrova.

Sondaı-aq, qan ortalyǵy ımmýndyq plazmanyń donoryna muqtaj. COVID-19 taralýyna baılanysty aımaqtyń medıtsınalyq mekemeleriniń ımmýndyq plazmaǵa degen qajettiligi artty. Ol koronavırýs ınfektsııasy bar naýqastardy emdeý úshin óte qajet.

«Ol úshin sońǵy 4-5 aıda ortasha jáne aýyr koronavırýsty juqtyrǵan 18 jastan asqan (júktiligi joq) áıelder men erler ımmýndyq plazma donory bola alady. Immýndyq plazmanyń donory bolǵysy keletinder jeksenbiden basqa kúnderi kún saıyn saǵat 08: 00-16: 00 aralyǵynda bizge habarlasýy kerek. Biz aldymen donorlyq tekserýdi, konsýltatsııany ótkizip, antıdene deńgeıin anyqtaımyz. Tekseris tegin júrgiziledi. Eger antıdene deńgeıi jaqsy bolsa, onda biz donorǵa yńǵaıly ýaqytty taǵaıyndaımyz jáne ony protsedýraǵa kútemiz. 600 ml ımmýndyq plazma úshin aqshalaı tólemniń mólsheri – 22 275 teńge», – dedi Lázzat Sabyrova.

Sondaı-aq, antıdeneniń qajetti deńgeıi bar, COVID-19-qa qarsy vaktsınatsııalanǵan oblys turǵyndary ımmýndyq plazmaǵa qan tapsyra alady.

Qan ortalyǵyna kelgen kezde jeke kýáliktiń túpnusqasy bolýy kerek. Plazmaǵa qan tapsyrý protsedýrasy kem degende eki saǵatqa sozylady.

Turǵyndar myna meken-jaıda antıdene tıtrin anyqtap, qan tapsyrýyna bolady: Qaraǵandy qalasy Kenshiler dańǵyly 81-úı.

Anyqtama telefondary: 50-30-33 (tirkeý), 50-79-09 (ishki nómir: 207, 250), 50-68-66.