Qaraǵandy oblystyq aýrýhanasynda bir jylda 13 myńnan astam tegin ota jasaldy

QARAǴANDY. QazAqparat – Ótken jyly Qaraǵandy oblystyq klınıkalyq aýrýhanasynyń dárigerleri 3841 josparly jáne 9211 shuǵyl ota jasady. Olardyń barlyǵy patsıentter úshin tegin boldy. Josparly kómek MÁMS sheńberinde, al shuǵyl kómek – tegin medıtsınalyq kómektiń kepildik berilgen kólemi boıynsha kórsetildi, dep habarlaıdy QazAqparat tilshisi.

Eń jıi kezdesetin otalardyń ishinde omyrtqaaralyq jaryq, qalqansha bezdegi qaterli isikterdi joıý, ót qabyn laparoskopııalyq alyp tastaý, laparoskopııalyq appendektomııa, aıaq-qol, ókpe jáne bronh, jambas múshelerine hırýrgııa, ýretraldy stentteý boldy.

«MÁMS sheńberinde oryndalatyn operatsııalardyń qatarynda búırekke, kókbaýyrǵa, baýyrǵa jáne ót shyǵarý joldaryna laparoskopııalyq operatsııalar, asqazanǵa rekonstrýktıvti operatsııalar, barıatrııalyq operatsııalar (semizdik kezinde). Shuǵyl kómek, onyń ishinde operatsııalar TMKKK-ge kiredi jáne mártebesine qaramastan tegin kórsetiledi. Naýqasqa jedel nemese shuǵyl kómek qajet bolǵan kezde, árıne, naýqastyń mártebesine eshkim qaramaıdy. Dárigerlerdiń basty mindeti – naýqastyń densaýlyǵyna nemese ómirine tóngen qaýipti joıý», – dep tolyqtyrdy hırýrgııa boıynsha OKA dırektorynyń orynbasary Borıs Tshaı.

Aıta ketý kerek, shuǵyl medıtsınalyq kómek kenetten bolǵan jiti aýrýlar men jaǵdaılar kezinde, densaýlyqqa keletin eleýli zııandy boldyrmaý jáne ómirge tóngen qaterdi joıý úshin kezek kúttirmeıtin medıtsınalyq aralasýdy talap etetin sozylmaly aýrýlardyń asqynýy kezinde kórsetiledi.

Shuǵyl medıtsınalyq kómek patsıenttiń ómirine aıqyn qaýip tóndirmeıtin kenetten jiti aýrýlar men jaı-kúıler, sozylmaly aýrýlardyń asqynýy kezinde kórsetiledi.