Qaraǵandy NIS oqýshysy kenshiler shaharynyń kórikti jerleriniń saıtyn ázirledi
Qashyqtan ótkizilgen baıqaýǵa barlyǵy úsh júzden astam joba usynyldy, dep habarlaıdy QazAqparat.
11-synyp oqýshysy Almýbdı Mýtaıhan sheteldikterge kenshiler shaharynyń tarıhı jáne mádenı kórikti jerleri týraly aqparat beretin aǵylshyn tilinde saıt qurdy.
Baıqaýǵa ol «Uly Dala órkenıeti» baǵyty boıynsha «Qaraǵandy qalasynyń tarıhı jáne mádenı oryndary» jobasyn usynyp, III oryndy ıelendi.
«Jobany daıyndaý barysynda men Qaraǵandy týraly kóptegen qyzyqty derekterdi bildim. «Týǵan elge taǵzym» jobasy oqýshylarǵa týǵan ólkesin jaqynyraq jáne tereńirek bilýge kómektesedi. Meniń jetekshim – aǵylshyn tili muǵalimi Áıgerim Quljabekova», – dedi Almýbdı.
Baıqaýda qatysýshylardyń jumystary birneshe baǵytta baǵalandy: «Uly Dala órkenıeti», «Týǵan ólkem – jumaq meken!», «Ult rýhanııaty – babalar amanaty», «Áleýmettik kásipkerlik jáne jańa ıdeıalardyń kúshi», «Bizdiń kúshimiz – birlikte!», «Selt etkizer eren oı» jáne «Týǵan jer – tuǵyrym».
11-shi jáne 8-shi synyp oqýshylary Sanjar Shalǵynbaı men Sofııa Dasaeva qazaq dalasynyń usaq shoqylarynyń aýmaǵynda jer qyrtysyn quraıtyn taý jynystarynyń jasyn, uzaqtyǵyn jáne qalyptasý rettiligin zerttep, konkýrsqa elektrondy kitap-albom usyndy. Oqýshylardyń jobasy «Týǵan ólkem – jumaq meken!» baǵyty boıynsha ІІІ orynǵa ıe boldy.
11 synyp oqýshysy Ádil Shaıahmetov pen 9 synyp oqýshysy Altynaı Qýatbek derekti fılm jasap, «Buqar danalyǵyndaǵy demokratııalyq órkenıet jáne onyń bolashaǵy» atty zertteý jumysyn usyndy. Olardyń jobasy da «Ult rýhanııaty – babalar amanaty» baǵyty boıynsha úshinshi orynǵa ıe boldy.
«Týǵan jer – tuǵyrym» essesinde úzdik avtorlardyń biri bolyp 12-synyp oqýshysy Aqmaral Daırabaı tanyldy. Ol II oryn aldy. Qyz bala esse jazýǵa daıyndyq kezinde belgili tulǵalar – kompozıtor Ahat Baıbosynov pen kúıshi professor Muhammedjan Tileýhanmen áńgimelesý qurmetine ıe bolǵanyn maqtan tutady.
«Qaraǵandylyq aqyndardyń shyǵarmashylyǵy týraly 10-synyp oqýshysy Aqbota Erkinbektiń zertteý jobasy joǵary baǵalanyp, «Selt etkizer eren oı» nomınatsııasy boıynsha ІІІ oryn aldy. Al 10-synyp oqýshysy Danıal Saǵymbaevtyń «Terrıkondardy qalpyna keltirý» jobasy jáne 9–10 synyp oqýshylary Medına Aıtbek, Jibek Aqan jáne Mendygaz Zeınollanyń «Týǵan ólkeni qoqystan saqtaıyq» atty komandalyq jumysy «Jasyl planeta» baǵytynda «Jas ekolog» arnaıy nomınatsııasynda marapattaldy», – dep habarlady Qaraǵandy qalasynyń NIS.