Qaraǵandy mýzykalyq komedııa teatry «Astana Opera» sahnasynda óner kórsetedi
QARAǴANDY. QazAqparat – Qaraǵandy akademııalyq mýzykalyq komedııa teatrynyń gastrolderi Nur-Sultan qalasynda ótedi. Ujym 8, 9 jáne 10 qazan kúnderi «Astana Opera» sahnasynda óner kórsetedi. Elordalyq kórermenderge alty spektakl usynylady, dep habarlaıdy QazAqparat tilshisi.
«Bul bizdiń elordadaǵy ekinshi gastroldik saparymyz. Alǵash ret 2019 jyly boldy, spektaklder kópshilikke unady. Anshlag boldy. Sodan keıin bizdi kelesi jylǵa shaqyrǵan bolatyn, biraq pandemııaǵa baılanysty ol saparymyzdan bas tartýǵa týra keldi. Endi mine, tolyq qurammen barǵaly jatyrmyz: ártister, grım jasaýshylar, kostıýmerler, qosalqy jáne tehnıkalyq tsehtar. Rekvızıtti jetkizý úshin eki Kamaz qajet boldy», - deıdi mýzkomedııa teatrynyń dırektory Amantaı Ibraev.
Gastroldik týrǵa arnaıy Belarýs Memlekettik akademııalyq mýzykalyq teatrynyń dırıjeri Nıkolaı Makarevıch shaqyryldy. Spektaklderge Qaraǵandy vokal mektebiniń debıýtant-tárbıelenýshileri qatysady.
Trýppa óziniń gastrolderin QR Memlekettik syılyǵynyń laýreaty ıÝrıı Aleksandrovtyń qoıylymyndaǵy Imre Kalmannyń áıgili «Sılva» operettasymen ashady. Keshki baǵdarlamada álemdik klassıka jaýhary – Iogann Shtraýstyń «Vals koroli» operettasy, sondaı-aq Aleksandr Kolkerdiń «Trýffaldıno» mıýzıkli jarııalanǵan.
Balalardy A. Ábdinurovtyń «Sıqyrly qus Samuryq», O.Klıýevtiń «Sıqyrly gúl», N. Makarevıchtiń «Kishkentaı mýk» mýzykalyq ertegilerine shaqyrady.
Qaraǵandy teatrynyń repertýarynda 280-nen astam qoıylym bar. Olardyń arasynda operettalar, mıýzıklder, baletter, operalar, jeke kontsertter, romans keshteri bar.
