Qaraǵandy men Temirtaýda hokkeıden Qazaqstannyń ІІІ Qysqy spartakıada oıyndarynyń aqtyq kezeńi bastaldy

Al erteń jarys jolyna Shymkent qalasynda mánerlep syrǵanaýshylar shyǵatyn bolady.

QR Sport jáne dene shynyqtyrý isteri agenttiginiń Ulttyq shtattyq komandalar jáne sport rezervi dırektsııasynyń habarlaýynsha, qysqy sporttyń 15 túri boıynsha sáýir aıyna deıin sozylatyn bul jarys 8 qalada ótpek. Onyń basty maqsaty Sochıde ótetin HHІІ Qysqy olımpıada oıyndaryna qatysý úshin rezervti jáne úmitkerlerdi qarastyrý.

Buǵan deıin olar 1-shi kezeńde oqý oryndarynda, uıymdardyń, mekemelerdiń ujymdarynda, áskerı bólimshelerde jáne turatyn jeri boıynsha sporttyń bólek túrlerinen ótkiziletin buqaralyq jarystarǵa qatysqan bolatyn. Ekinshi kezeńde, oblystyq jáne qalalyq spartakıadalar, memlekettik jáne qoǵamdyq uıymdardyń belsendi qatysýymen dene shynyqtyrý jáne sport boıynsha jergilikti atqarý uıymdarynyń uıymdastyrýymen ótkizildi. Bul synaqtan súrinbeı ótkender endi 3-shi aqtyq synda baq synaıtyn bolady. Onda jalpy komandalyq esepte birinshi orynǵa ıe bolǵan komanda aýyspaly Kýbokpen jáne QR Sport jáne dene shynyqtyrý isteri agenttiginiń dıplomdarymen marapattalady. Ekinshi jáne úshinshi oryndarǵa ıe bolǵan komandalar Kýboktermen jáne sáıkes dárejedegi dıplomdarmen marapattalady.

2003 jyly ótken І Qysqy spartakıadada - bıatlon, taý shańǵy sporty, konkı sporty, shańǵy jarysy, serpilmeden shańǵymen sekirý, frıstaıl, erler arasyndaǵy shaıbaly hokkeı, dopty hokkeı, short-trek sııaqty 10 sport túrinen uıymdastyrylyǵan bolatyn. Onda aqtyq jarystar Shyǵys Qazaqstan, Qaraǵandy, Batys Qazaqstan, Pavlodar oblystary men Almaty, Astana qalalarynda ótti. Al ІІ spartakıada 2009 jyly 14 sport túri boıynsha uıymdastyryldy. Onda jalpy komandalyq esepte Shyǵys Qazaqstan oblysy birinshi oryndy enshilep, Almaty qalasy men Pavlodar oblysy 2-3 oryndy bólisken edi.