Qaraǵandy men Pavlodar oblystaryndaǵy 3 kópir qurylysy qashan aıaqtalady

ASTANA. QazAqparat – Búgin Úkimet otyrysynda Premer-Mınıstr Álıhan Smaıylov Qaraǵandy men Pavlodar oblystary aýmaǵynda salynyp jatqan 3 kópir qurylysynyń áli paıdalanýǵa berilmegendigine alańdaýshylyq tanytty, dep habarlaıdy QazAqparat tilshisi.

«Jol kartasy boıynsha Qaraǵandy oblysynda 2 kópir jáne Pavlodar oblysynda bir kópir salyný tıis edi. Bul jumys áli de oryndalǵan joq. Osy kópirler qashan aıaqtalady?», - dep suraǵan edi Úkimet basshysy Indýstrııa jáne ınfraqurylymdyq damý mınıstri Marat Qarabaevtan.

Saýalǵa jaýap bergen mınıstr Qaraǵandy oblysyndaǵy Nura ózeninen ótetin kópirdiń qurylysy qazirgi ýaqytta 60 paıyzǵa aıaqtalatynyn aıtady.

«Ondaǵy 7 aralyq qurylystyń beseýi tolyǵymen bitti. Keshe merdiger kompanııamen sóılestik. Maýsym aıynyń sońyna deıin temir-beton quıý jumysyn bitiredi. Sol maýsym aıynda kópirmen kólikterdiń júrýine múmkindik týyndaıdy. Al jalpy kópirdiń qurylysy kúzde aıaqtalady. Al Soqyr ózeni arqyly ótetin kópir qurylysy 80 paıyzǵa oryndalǵan. Qazir temir-beton quıý jumystary júrgizilip jatyr. Sý tasqyny kezeńi bastalǵanǵa deıin, ıaǵnı naýryz aıyna deıin kópirmen kólikterdiń ótýi qamtamasyz etiledi», - dedi ol.

Mınıstrdiń aıtýynsha, Pavlodardaǵy Qalqaman-Baıanaýyl avtojolyndaǵy kópir qurylysy byltyr tolyǵymen bitken.

«Kólik júrip jatyr. Biraq, jobaǵa ózgerister engizilip, kópirge kireberis joldardy jóndeý qarastyrylǵan. Ol jumys bıyl atqarylady. Jalpy kópirdiń jáne joldyń qurylysy jyldyń sońyna deıin aıaqtalady», - dedi Marat Qarabaev.