Qaraǵandy mektepterinde oqýshylardyń tamaqtanýy boıynsha joba iske asyrylady
ASTANA. QazAqparat - Qaraǵandy oblysynyń 15 mektebinde oqýshylardy saýyqtyrý boıynsha joba júzege asyrylyp jatyr. Ózara seriktestik jaıly memorandým Bilim jáne Densaýlyq basqaramalary men «Nur Otan» partııasynyń qaraǵandylyq fılıaly arasynda quryldy, dep habarlaıdy oblystyq ákimdiktiń baspasóz qyzmeti.
Bul joba pılottyq rejımde elimizdiń barlyq óńirlerinde iske qosyldy. Onyń máni bilim mekemelerinde as máziri ózgertiletininde - zııandy taǵamdardan bas tartylyp, anaǵurlym paıdaly azyq-túlikter qoldanylady. Dene shynyqtyrý belsendiligine basa nazar aýdarylyp, aldyn alý jáne shynyǵý sharalaryn ótkizýge kóńil bólinedi.
Qazir jobaǵa qatysýshy mektepterde balalardy medıtsına qyzmetkerleri tekserip jatyr. Bul shara oqýshylardyń jalpy densaýlyǵyn tekserý maqsatynda jasalyp otyr. Barlyq jınalǵan málimetter taldaý ótkizilip, saralanady.
- Ókinishke oraı, biz barlyǵymyz balalardy mektepke deni saý kúıinde alyp keledi, alaıda 11-shi synypqa qaraı olarda densaýlyqtaryna qatysty problemalar týyndaıdy. Osy joba arqyly biz ol problemalardy barynsha azaıtýǵa tyrysamyz, - dep málimdedi Qoǵamdyq densaýlyq saqtaý departamentiniń jetekshisi Qaırat Baımuhambetov.
Saýyqtyrý baǵdarlamasy sondaı-aq Qaraǵandy oblysynyń tórt balabaqshasynda da iske qosyldy. Balalarmen onda sportpen shuǵyldanyp, tuzdy shahtalarǵa alyp baryp, shynyqtyrady.
Osyǵan deıin elimizdiń barlyq mektepteri jańartylǵan as mázirine aýysady dep habarlanǵan bolatyn. Dálirek aıtar bolsaq, bilim berý mekemeleriniń ashanalarynda shujyqtar, sosıskalar, kúrdeli salattar, irimshik jáne sút ónimderine tyıym salyndy.
