Qaraǵandy mektepterinde qoqys bólektep jınalatyn konteınerler ornatylady
QARAǴANDY. QazAqparat - Qaraǵandy qalasyndaǵy mektepterde qoqysty suryptap jınaıtyn konteınerler ornatylady, dep habarlaıdy QazAqparat oblys ákimdiginiń saıtyna silteme jasap.
Aktsııa sheńberinde qaraǵandylyq mektepterde bólek jınalatyn qoqys konteınerleri ornatylady. Olarǵa qaǵaz, plastık, temir nemese alıýmınıı qaptamalardy, shyny jáne tetrapaketterdi tastaýǵa bolady.
«Vpererabotký» aktsııasy Qoǵamdyq mańyzdy bastamalardy damytý qory Qaraǵandy oblystyq bilim basqarmasymen birlesip ótkizip otyr. Onyń maqsaty - oqýshylarǵa qoqysty bólshektep jınaýdyń mańyzdylyǵyn kórsetý bolyp tabylady.
Osy maqsatta Qaraǵandyda bilim bólimi, qaldyq óńdeıtin «Recycling» JShS jáne Qoǵamdyq mańyzdy bastamalar qory arasynda memorandým jasaldy. Ázirge vedomstvolar tek 2019 jylǵa ózara seriktestikke kelisim jasady, alaıda eger ol sátti ótse, ári qaraı da jalǵasady.
Qazirgi tańda Qaraǵandynyń barlyq mektepterinde qaǵaz, shyny, temir, plastık laqtyratyn arnaıy konteınerler ornatyldy. Olar tolǵan saıyn «Recycling» JShS mamandary qoqys jáshikterin aýystyryp otyrady.
«Vpererabotký» aktsııasy Qazaqstannyń barlyq qalalarynyń oqýshylary qatysatyn «EkoChallenge» aýqymdy baıqaýynyń bir bóligi bolyp tabylady. Olardyń árqaısysy arnaıy portalda tirkeledi, onda ekologııa taqyrybynda ótetin barlyq sharalar belgilenedi. Eń kóp shara ótkizgen mektep Qoǵamdyq mańyzdy bastamalar qorynan aqshalaı grant utyp alý múmkindigine ıe bolady. Ol qarajatty ekologııalyq jobalarǵa, dálirek aıtsaq, mektep jylyjaıyn salýǵa nemese gıdroponıka kabınetin jabdyqtaýǵa jumsaýǵa bolady.
Baıqaý qorytyndysy aǵymdaǵy jyldyń tamyzynda jasalady.
