Qaraǵandy mektepterinde bastaýysh synyp oqýshylaryn tegin tamaqtandyratyn bolady
QARAǴANDY. QazAqparat - Qaraǵandy oblysynyń mektepterinde jańa oqý jylynan bastap bastaýysh synyp oqýshylaryn tegin tamaqtandyra bastaıdy. Bul týraly aımaq basshysy Jeńis Qasymbek halyqpen eseptik kezdesýinde málimdedi, dep habarlaıdy QazAqparat tilshisi.
«Oblystyq máslıhat depýtattarynyń qoldaýymen biz otbasynyń materıaldyq jaǵdaıyna qaramastan 1-den 4-synypqa deıingi oqýshylardy kezeń-kezeńimen ystyq tamaqpen qamtamasyz etý týraly sheshim qabyldadyq. Birinshi jáne ekinshi synyptar bıylǵy jyldyń 1 qyrkúıeginen bastap tegin ystyq tamaqpen qamtamasyz etiledi. 2021 jyly – úshinshi synyptar, 2022 jyly - tórtinshi synyptar», - dedi oblys ákimi.
Sonymen qatar, Jeńis Qasymbek óz esebinde mektepterdi jóndeý boıynsha 3 jyldyq baǵdarlamany usyndy. Óńirde úsh aýysymdy oqytýmen qatar apatty jaǵdaıdaǵy birde-bir mektep qalmaıdy, dep málimdedi ol. Oqý oryndarynyń 542 ǵımaratyn jóndeý jáne 11 jańa ǵımarat salý josparlanýda. Bul maqsatqa 40 mlrd teńge jumsalmaq.
Ákimniń aıtýynsha, barlyq mektepte qaýipsizdikti kúsheıtý úshin beınebaqylaý kamerasy ornatylady.
Jeńis Qasymbek sondaı-aq qalalyq jáne aýyldyq balalarda ózindik damýdyń qandaı jańa múmkindikteri paıda bolatynyn aıtty. Oblysta qosymsha bilim berý ortalyqtarynyń sany artylady. Osy jyly Qaraǵandyda Balalar men jetkinshekter saraıy jáne Sátbaev qalasynda Oqýshylar saraıy ashylady. Aqtoǵaı, Ulytaý jáne Qarqaraly aýdandarynda jas týrıster men natýralıster stansalaryn ashý josparlanyp otyr. Jańaarqa aýdanynda Oqýshylar úıi salynady, Buqar jyraý jáne Osakarov aýdandarynda balalar tehnoparkteri jabdyqtalady.
