Qaraǵandy mektepteri josyqsyz merdigerlerdi sot arqyly moıyndatty
QARAǴANDY. QazAqparat - Qaraǵandydaǵy orta mektepterdiń qurylys kompanııalaryn memlekettik satyp alýlardyń josyqsyz qatysýshylary tizilimine engizý jáne turaqsyzdyq aıybyn óndirip alý týraly talaptary qanaǵattandyryldy, dep habarlaıdy «QazAqparat» HAA tilshisi.
Qaraǵandy men Saran qalasynyń eki mektebi merdiger qurylys fırmalarynyń josyqsyz merdiger retinde moıyndalýyna qol jetkizdi. Qaraǵandydaǵy №3 óner mektebiniń «National Elit Company» qurylys kompanııasyna qatysty talaby qanaǵattandyryldy. Kelisimshart boıynsha atalǵan fırma mekteptiń shatyryn 2 mıllıon 645 myń teńgege jóndeýge tıis bolǵan. Alaıda, jumys oryndalmaǵan. Merdiger kompanııa mektep ákimshiligimen baılanysqa shyqpaǵan. Sot otyrysyna da kelmegen.
Qaraǵandy oblysy mamandandyrylǵan aýdanaralyq ekonomıkalyq sotynyń sýdıasy Aınur Arapova bilim mekemesiniń talabyn qanaǵattandyrdy.
«Osylaısha sot jaýapkerdiń júktelgen mindetin oryndamaǵanyn, «Memlekettik satyp alýlar týraly» zańnyń 12-babyn sanaly túrde buzǵanyn anyqtady. Baıandalǵandardy saraptaı kele, talap-aryzdaǵy keltirilgen shaǵymdar dáleldi dep tanyldy. «National Elit Company» JShS memlekettik satyp alýlardyń josyqsyz qatysýshysy dep tanylsyn», - dep málim etti sýdıa Aınur Arapova.
Bul kásiporyndar sot sheshimi zańdy kúshine engen kúnnen bastap 24 aı ishinde memlekettik satyp alýlarǵa qatystyrylmaıdy. Sonymen qatar, Saran qalasyndaǵy №1 jalpy bilim beretin mektep ákimshiligi de sotta jeńiske jetti. «Edemstroı» merdiger uıymy sot sheshimi boıynsha 18 myń 696 teńge kóleminde turaqsyzdyq aıybyn óteýge mindetteldi.
