Qaraǵandy mektebinde daý-damaı: Oqýshy dıspanserge jatqyzyldy
QARAǴANDY. QazAqparat - Búgin tańerteń, 21 qyrkúıek kúni Qaraǵandy mamandandyrylǵan balalar júıke aýrýlary dıspanserine orta mekteptiń 4-synyp oqýshysy jatqyzyldy. Ony synyptastary ózderin uryp-soqty, muǵalimderge dórekilik tanytty dep aıyptaǵan.
4 synyp oqýshylarynyń ata-analarynyń aıtýynsha, bala eki jyldan beri sabaqtyń ótýine kedergi keltirip, synyptastaryn jábirlep, pedagogtarǵa dórekilik tanytyp kelgen. «Ony oqýdan shyǵarý, polıtsııanyń arnaıy esebine qoıý máselesi kóterilmeı keldi. Onyń barlyq áreketin keshirip keledi», - dep ashýlanýda balalardyń ata-analary.
Osyǵan baılanysty ata-analar 19 qyrkúıek kúni balalaryn mektepke jibermeı qoıǵan. Mektep ákimshiligi tez arada qajetti sharalar qoldanǵan. Dırektordyń tárbıe isi jónindegi orynbasary Gúlmaıra Naýryzbekovanyń aıtýynsha, sabaqqa synyptyń barlyǵy emes, tek oqýshylardyń bir bóligi qatyspaǵan. «Biz balanyń anasymen profılaktıkalyq jumystar júrgizdik, ýchaskelik polıtsııa ınspektorymen kezdestik. Qazir ol mamandandyrylǵan balalar júıke aýrýlary dıspanserine jatqyzyldy. Dıagnozyn dárigerler jarııalaı almaıdy. Búginnen bastap ol bala mektepte joq. Synyptaǵy oqý protsesi qalpyna keltirildi», - dep habarlady dırektordyń tárbıe isi jónindegi orynbasary Gúlmaıra Naýryzbekova.
Balanyń buryn da mamandandyrylǵan júıke aýrýlary mekemesine qaralǵany anyqtaldy. Onyń qalaısha jaı mektepke kelgenin mektep ákimshiligi túsindirýden bas tartty.
