Qaraǵandy mektebinde bilim kúnine oraı hokkeı korty ashyldy
QARAǴANDY. QazAqparat - Qaraǵandy ákimi Nurmuhambet Ábdibekov Qaraǵandy qalasy № 101 mektep-lıtseıinde boldy, dep habarlady óńir basshysynyń baspasóz qyzmetinen.
Oblys ákimi oqýshy jumystarynyń kórmesi men Prezıdenttik zaldy tamashalap, mektep-lıtseı túlekterimen áńgimelesti. «Elbasy Nursultan Nazarbaev bilim salasyna kóp kóńil bóletini sizderge belgili. Qazaqstandy básekege qabiletti eń damyǵan memleketterdiń qataryna bilimdi adamdar ǵana shyǵara alady. Sizderdiń de osyndaı saýatty adam bolatyndaryńyzǵa senemin», - dedi N. Ábdibekov saltanatty sharada sóılegen sózinde.
Óńir basshysy pedagogtardy, mektep-lıtseı oqýshylary men olardyń ata-analaryn jańa oqý jylymen quttyqtap, ámbebap hokkeı kortynyń sertıfıkatyn usyndy. № 101 mektep-lıtseıi Qaraǵandydaǵy úzdik bilim berý mekemeleriniń bestigine kiredi. Ol 12 jyldyq bilim berý tájirıbesin engizý boıynsha respýblıkalyq eksperımentaldyq alań bolyp tabylady. UBT-da 2014 jyly ortasha upaı 102,2 qurady. Qaraǵandy oblysynda 532 jalpy bilim berý mektebi bar. Onda 171 myń adam bilim alady. Búginde óńirde 19,5 myń bala birinshi synypqa bardy.
