Qaraǵandy mektebi el Prezıdentinen syılyq aldy
QARAǴANDY. QazAqparat – Qaraǵandydaǵy №104 mektep-gımnazııasy Jańa jylqarsańynda Qazaqstan Prezıdentiniń atynan syılyq aldy. Memleket basshysy Qasym-Jomart Toqaev qarasha aıynda Qaraǵandy oblysyna jumys sapary barysynda jańa oqý ornyna kelgen bolatyn. Sol kezde oqýshylar mektep avtobýsy bolsa degen nıetin bildirgen edi. Endi mine olardyń armany oryndaldy, dep habarlaıdy QazAqparat tilshisi.
Balalarǵa arnalǵan jaıly avtobýs jeltoqsan aıynda Saran qalasynda ashylǵan QazTehna jańa zaýytynda qurastyrylǵan. Memleket basshysynyń atynan syılyqty tabys etý jas jumysshylarǵa júkteldi.
«Biz komandamyzben osy mektep avtobýsyn qurap, jınadyq. Meniń oıymsha, bul
balalarǵa arnalǵan tamasha jańajyldyq syılyq. Bizdiń zaýytta avtomobıl jasaýdyń álemdik kóshbasshysy bolyp tabylatyn Yutong markaly zamanaýı avtobýstar óndirisi bastaldy. Oblysta osyndaı kásiporynnyń ashylǵanyna qýanyshtymyn. Endi Saran jáne oǵan jaqyn ornalasqan qalalardyń turǵyndary úshin jańa jumys oryndary ashyldy, sondaı-aq otandyq mashına jasaýdy damytýǵa yqpal etetin bolady. Munda kóptegen jas mamandar jumysqa ornalasty. Men Qaraǵandy tehnıkalyq ýnıversıtetiniń kólik-jol fakýltetin bitirip, endi
mamandyǵym boıynsha jumys taba aldym», - deıdi slesar-qurastyrýshy Jaras
Isabekov.
Gımnazııanyń aýlasynda avtobýsty oqýshylar, pedagogtar men ata-analar qarsy aldy.
Barlyq oqýshylar atynan 11-synyp oqýshysy Іńkár Qulmaǵambetova alǵys bildirdi.
«El Prezıdenti qarasha aıynda bizdiń mektepke keldi. Men onymen jeke sóılesýge
múmkindik aldym. Bizdiń mektep oǵan óte unady. Prezıdent bizge ne qajet ekenin suraǵan bolatyn. Shynymdy aıtsam, biz birden jaýap bere almadyq, óıtkeni biz úshin kóp nárse jasaldy - barlyq múmkindikter bar. Biz mektep avtobýsyn suradyq, sebebi bárine qoǵamdyq kólikpen júrý yńǵaısyz», - dedi Іńkár.
Atalmysh mektep-gımnazııada 900 bala oqıdy. Oqý ordasynyń dırektory Jadyra
Baımoldınanyń aıtýynsha, avtobýs baıqaýlarǵa, jarystarǵa jáne ekskýrsııalarǵa barý úshin paıdalanylady. Sondaı-aq, «Kúngeı» shaǵynaýdanynda turatyn oqýshylardy mektepke jáne úılerine jetkizedi.
«Bizde gýmanıtarlyq baǵyttaǵy mektep-gımnazııa bar. Barlyq jaǵdaı jasalǵan, oqýshylardy qosymsha bilimmen de qamtı alamyz. STEM-zerthanasy, robototehnıka jáne ıntellektým kabınetteri, telestýdııa jáne medıaortalyq, ART-stýdııa jáne horeografııa zaly bar», - dep atap ótti dırektor.
Oblysta barlyq mektepterdi osyndaı avtobýstarmen qamtamasyz etý josparlanyp otyr.
Olardy kelesi jyldan bastap bıýdjet qarajatyna satyp ala bastaıdy.
Esterińizge sala keteıik, Saran qalasynda burynǵy RTB zaýytynyń óndiristik alańy
qaıta jandandyryldy. Jeltoqsan aıynda munda avtobýstar, elektr avtobýstary men
arnaıy tehnıka shyǵaratyn QazTehna zaýyty ashyldy. Qýattylyǵy jylyna 1 200
avtobýs, 500 arnaıy tehnıka. Tolyq qýatqa shyqqan kezde 1000-nan astam jumys
orny qurylady. El ishinde jańa avtobýstardy jetkizýge tapsyrystar bar. Bolashaqta jaqyn shet elderge ónim eksporttalýy múmkin.
