Qaraǵandy mańyndaǵy trassada iri kólik apaty boldy
QARAǴANDY. QazAqparat - 9 aqpan kúni Qaraǵandydan shyǵa beriste, Dýbovka aýyly mańyndaǵy trassada asa iri jol-kólik oqıǵasy boldy, alty avtokólikke zaqym keldi, dep habarlaıdy «QazAqparat» HAA tilshisi.
«Tańerteń burqasyn saldarynan joldyń durys kórinbeýinen alty avtokólik soqtyǵysty. Ákimshilik quqyqbuzýshylyqtar týraly kodekstiń 610-baby, 1-bólimi boıynsha hattama toltyryldy», - dep habarlady Qaraǵandy oblysy ІІD baspasóz qyzmetiniń jetekshisi Baqytjan Qudııarov.
Aıypty tulǵany anyqtaý jumystary júrgizilip, jol-kólik oqıǵasy bolǵan oryn shemasy syzylyp jatqanda, zaqymdalǵan avtokólikter jol boıynda turdy jáne kólik qozǵalysyna aıtarlyqtaı kedergi keltirdi.
«Qazirgi ýaqytta jol ashyq. Qaza tapqandar men jaraqat alǵandar joq. Іshki ister departamenti jolaýshylardy asa muqııat bolýǵa jáne aýa raıy boljamyna zer salyp júrýge shaqyrady», - dedi B.Qudııarov.
