Qaraǵandy mańyndaǵy polıgon órtine kináliler anyqtaldy
QARAǴANDY. QazAqparat – Qaraǵandy oblysy boıynsha Ekologııa departamentiniń basshylyǵy 25 sáýirden beri janyp jatqan Doskeı aýylyndaǵy polıgonǵa bardy. Vedomstvo qatty turmystyq qaldyqtar polıgonyn ustaý erejeleriniń jáne ekologııalyq normalardyń buzylǵanyn anyqtady, dep habarlaıdy QazAqparat tilshisi.
Qatty-turmystyq qaldyqtar (QTQ) polıgony Qaraǵandy oblysy Buqar Jyraý aýdany Doskeı aýyldyq okrýginiń aýmaǵynda 2013 jyldan bastap qazirgi ýaqytqa deıin jumys istep keledi. Jer ýchaskesi sanıtarlyq jáne ekologııalyq normalardy saqtaı otyryp paıdalaný boıynsha shektelgen. 2019 jyly jınaqtalǵan qaldyqtardyń kólemi 8 590 tonnany, aýmaǵy 4 531 m2 qurap otyr.
QTQ polıgonynyń menshik ıesi «Іzashar» JShS bolyp tabylady.
Esterińizge sala keteıik, bıylǵy 15 sáýirde polıgonda turmystyq qaldyqtar (qaǵaz, plastık, karton), kúl-qoj jáne basqa da tez tutanatyn zııandy zattar órtengen edi. Osylaısha Doskeı aýyly men Qaraǵandy qalasynyń aýmaǵyna ýly tútin bulty tarala bastady. Jergilikti turǵyndar atalmysh jaǵdaıǵa narazylyq bildirdi.
Osyǵan baılanysty jáne QTQ polıgonyndaǵy órtti joıý maqsatynda aýyl ákiminiń mindetin atqarýshy 23 sáýirde Doskeı aýyldyq okrýgi aýmaǵynda jergilikti aýqymdaǵy tehnogendik sıpattaǵy tótenshe jaǵdaı rejımin jarııalaý týraly sheshim qabyldady.
«Tıisti is-sharalardy ótkizý úshin aýdan jáne oblystyń tótenshe jaǵdaılar jónindegi ýákiletti organdarynyń kúshteri men quraldary, erikti órt sóndirý quramalary, merdigerlik uıymdardyń arnaıy jáne ınjenerlik tehnıkasy (býldozerler, tıegishter jáne t.b.) janyp jatqan qoqysty topyraqpen kómýge, janǵysh qoqys qaldyqtaryn jınaýǵa jáne basqa da is-sharalarǵa tartyldy», - dep habarlady ákimdikten.
Aıta ketý kerek, jergilikti turǵyndar polıgonnyń tıisti deńgeıde ustalmaıtyndyǵyna birneshe ret shaǵymdanǵanyn aıtady. Muny jergilikti ákimdikte de rastady.
«Atalǵan másele boıynsha aýdan turǵyndary men memlekettik organdar tarapynan QTQ polıgonyn qoldanystaǵy zańnamaǵa jáne ózge de normatıvtik-quqyqtyq aktilerge sáıkes tıisti qalypqa keltirý boıynsha «Іzashar» JShS-ǵa birneshe ret tıisti hattar joldandy. Jyl saıyn kóktemgi jáne jazǵy kezeńde atalǵan QTQ polıgonynda kórsetilgen turmystyq qaldyqtar men basqa da tutanǵysh zııandy zattar únemi janady», - dep habarlady Doskeı aýyldyq okrýginiń ákimdiginen.
Sondaı-aq, jergilikti bılik «Іzashar» JShS órt bastalǵannan beri ony sóndirý boıynsha sharalar qabyldamaǵanyn habarlaıdy. Sonymen birge polıgonnyń menshik ıesi QTQ polıgonyn kútip ustaý jónindegi ekologııalyq normalar men qaǵıdalar talaptaryn; qaldyqtardy qabyldaý rásimderin; polıgonǵa óndiristik monıtorıngin júrgizý kestesin saqtamaǵan. Budan bólek, ekologııalyq baqylaý jospar-kestesinde jáne qorshaǵan ortaǵa emıssııalarǵa ruqsatta kózdelgen qaldyqtardyń qorshaǵan ortaǵa zııandy áserine baqylaý júrgizilmegen, órt qaýipsizdigin tómendetý jónindegi is-sharalar qabyldanbaǵan.
28 sáýirde «Іzashar» JShS QTQ polıgonynyń janý faktisi baılanysty Qaraǵandy oblysy boıynsha Ekologııa departamenti mamandary polıgon aýmaǵyna qaıta shyqqanyn habarlady.
«Buǵan deıin Buqar Jyraý aýdany Doskeı aýyly ákiminiń kelip túsken haty negizinde 15 sáýirde Qaraǵandy oblysy boıynsha Ekologııa departamentiniń basshysy Qanat Musaparbekov «Іzashar» JShS kásipornynyń QTQ polıgony aýmaǵynda Doskeı aýylynyń turǵyndarymen kezdesý ótkizdi. Kezdesý barysynda ekologııa departamentiniń basshysy «Іzashar» JShS kásiporny mıkrokásipkerlik sýbektisine jatatynyn aıtty. Sondaı-aq, atalǵan fakti boıynsha departament qabyldanǵan sharalar týraly turǵyndardy habardar etti.
Esterińizge sala keteıik, QR Prezıdentiniń Shaǵyn jáne orta bıznesti tekserýge moratorıı engizý týraly Jarlyǵyna baılanysty departament polıgonǵa tekserý júrgizý máselesin sheshýde.
Sapar qorytyndysy boıynsha «Іzashar» JShS dırektory A.Zıkırov halyq aldynda polıgon aýmaǵyn eki aı ishinde ekologııalyq zańnamaǵa sáıkes keltirý mindettemesin aldy. Osylaısha, kásiporyn topyraq qabatymen oqshaýlaý jáne QTQ qabatyn tyǵyzdaý, sondaı-aq polıgon aýmaǵy boıynsha qorshaý ornatý boıynsha jumystardy júrgizýge mindettenedi», - dep túsindirdi Qaraǵandy oblysy boıynsha Ekologııa departamentinen.
