Qaraǵandy mamandandyrylǵan «Daryn» mektep-ınternatyna 25 jyl toldy

QARAǴANDY. QazAqparat – Qaraǵandy mamandandyrylǵan «Daryn» mektep-ınternatynyń ashylǵanyna 25 jyl toldy. Osy jyldar ishinde 21 ret túlekterdi úlken ómir jolyna shyǵaryp salǵan, olardyń ishinde 60-tan astam «Altyn belgi» ıegerleri, 160 halyqaralyq ǵylymı jobalar konkýrstarynyń jeńimpazdary bar. Búgingi tańda mektep-ınternatta 497 daryndy bala bilim alýda, dep habarlaıdy QazAqparat tilshisi.

10-11 synyp oqýshylary mektep mereıtoıyna «Abaı joly» roman-epopeıasy boıynsha spektakl usyndy, al besinshi synyp oqýshylary muǵalimdermen birge mýzykalyq shyǵarmalar daıyndady.

Sondaı-aq, mekteptiń týǵan kúnine oraı «Muǵalim – mektep júregi» qurmet taqtasy ashylyp, oqýshylardyń shyǵarmashylyq jumystarynyń kórmesi uıymdastyryldy.

«Bizdiń tárbıelenýshilerimiz jaqsy qyzmet atqarady, shetelde oqıdy. Mekteptiń alǵashqy oqýshylarynyń biri Murat Jumanbaı - «Elbasy akademııasy» KQ basqarýshy dırektory, al 2009 jylǵy túlek Daryn Telman - «Álem stýdenti» ataǵyna ıe bolǵan úsh qazaqstandyqtyń biri, «Ǵylym álemin ashý» halyqaralyq konferentsııasynyń qurmetti qonaǵy, sondaı-aq respýblıkalyq aeroǵarysh konferentsııasynyń birneshe dúrkin jeńimpazy, ál-Farabı atyndaǵy QazUÝ bilim berý grantynyń ıegeri. 2010 jylǵy túlegimiz Aıan Núsipbekov Nobel syılyǵynyń laýreaty J. I. Alferovtyń Qazaqstandaǵy alǵash stıpendıaty atandy, qazirgi ýaqytta Sıngapýrde doktorlyq dáreje alýǵa oqytýdan ótip jatyr», – dep mektep dırektory Lázzat Temirhanova túlekterdiń jetistikterin bólisti.

Mektep mereıtoıyna arnalǵan saltanatty sharada oqýshylardyń jeńisteri ǵana emes, oqý orny ashylǵan sátten bastap búgingi kúnge deıingi muǵalimderdiń jetistikteri de atap ótildi.