Qaraǵandy qylmystyq top ınternette avtobólshek izdegen turǵyndardan 4 mln teńge aldap alǵan
NUR-SULTAN. QazAqparat – Internet arqyly avtobólshek izdegen adamdardy aldap, 4 mln teńgeden astam jymqyrǵan qaraǵandylyq jigitter sot úkimimen bas bostandyǵynan aıyryldy, dep habarlaıdy QazAqparat tilshisi.
Іshki ister mınıstrligi Tergeý departamentiniń bastyǵy Sanjar Ádilov vedomstvonyń aqparat alańynda osyndaı málimet aıtty.
«Qaraǵandy oblysynda 20-25 jas aralyǵyndaǵy jigitterden quralǵan top qazaqstandyq ınternet-saýda alańdarynda avtobólshekter satylatyny týraly jalǵan jarnama jarııalap otyrǵan. Saldarynan 23 azamat zardap shekti. Keltirilgen materıaldyq shyǵynnyń kólemi 4 mln teńgeden asady. Bul is boıynsha sot úkimi shyqty. Kináliler 2,5 jyldan 3,5 jylǵa deıin bas bostandyǵynan aıyryldy», - dedi Tergeý departamentiniń bastyǵy.
Eske salsaq, osyǵan uqsas alaıaqtyq áreketi úshin Jambyl oblysynyń turǵyny 3,5 jylǵa sottalǵan bolatyn. Ol Instagram arqyly 40-tan astam adamnyń aqshasyn ıemdenip ketken.
