Qaraǵandy qoımalarynda 1 mln tonnadan astam kómir qory bar

QARAǴANDY. QazAqparat – Qaraǵandy oblysynyń elektr stansalary kómir men mazýttyń qajetti qorymen qamtamasyz etilgen. Óńirde bıylǵy jylytý maýsymyna daıyndyq jaıly óńirlik kommýnıkatsııalar qyzmetiniń alańynda ótken brıfıngte energetıka jáne TKSh basqarmasy basshysynyń orynbasary Nurjan Naqypbekov aıtyp berdi, dep habarlaıdy QazAqparat tilshisi.

Qaraǵandy óńiriniń jeti elektr stantsııasynda jetkilikti otyn qory bar. Qoımalarda 1 mln 90 myń tonnadan astam kómir jáne 21 myń tonna mazýt daıyndalǵan.

Qazirgi ýaqytta oblysta kómir satatyn 33 núkte jumys isteıdi. Qatty otyndy jetkizý maýsym aıynda bastaldy.

Onyń ishinde halyqtyń qajettiligi úshin kómir jetkizilip jatyr.

Sondaı-aq, barlyq iri energııa kózderinde negizgi jabdyqtardy jyl boıy jóndeý jumystary júrip jatyr. 32 qazandyq pen 19 týrbınada jóndeý jumystary aıaqtaldy.

Jóndeý protsesinde 8 qazandyq pen 5 týrbına qalady.

Mamyrdan qazanǵa deıin aımaqtyń jabdyqtary men jelilerin daıyndaý jumystary júrgizildi.

«7 stantsııa, 680 jergilikti qazandyq, 570 elektr qosalqy stantsııa jáne 2 myń shaqyrymnan astam ınjenerlik jeliler, onyń ishinde jylý, sý jáne elektr jelileri jabdyqtaryn daıyndaý oryndaldy. 1126 áleýmettik nysan men 5,5 myń kópqabatty úı daıyndaldy», – dedi Nurjan Naqypbekov.

Іri jobalarda jumys jalǵasady. Kelesi jyly Qaraǵandyda JEO-3-te úshinshi jylý taratqyshtyń qurylysy aıaqtalýy tıis.

Búgingi tańda 7 myń shaqyrym qubyr tóseldi. Bolashaqta osy stantsııadan Ońtústik-Shyǵysta belsendi salynyp jatqan shaǵyn aýdandar jylýmen qamtamasyz etiledi.

Balqashta 1-shi jáne 2-shi jylý magıstraldary boıynsha iri joba qolǵa alynǵan. Olar qala tutynýshylarynyń basym bóligin jylýmen qamtamasyz etip otyr.

Jóndeý jumystaryn kelesi jyly aıaqtaý josparlanǵan.

Qurylys-montaj jumystary Sarandaǵy qazandyqta da júrip jatyr. Olar aıaqtalǵannan keıin 2023 jyly turǵyndar ortalyqtandyrylǵan jylýmen qamtamasyz etiledi.