Qaraǵandy kóshesinde egeýquıryqtar qaptap júr
QARAǴANDY. QazAqparat - Qaraǵandydaǵy Erjanov kóshesiniń qoqys alańynda egeýquıryqtar kóbeıip ketken, dep habarlaıdy QazAqparat.
Qalanyń ortalyq kósheleriniń biri sanalatyn Erjanov kóshesi №55 jáne №43 úı turǵyndary úshin qoqys jáshigine barý qorqynyshqa aınalǵan. Óıtkeni bul jerdi egeýquıryqtar toby mekendeıdi. Tipti olar erkinsip adamdardan seskene qoımaıtyn kórinedi.
Turǵyndardyń aıtýynsha, egeýquıryqtar qoqys alańyndaǵy óz aımaqtaryn qorǵap, kisige aıbat shege bastaǵan.
«Egeýquıryqtar qoqys qaldyqtaryn jep semirip alǵan sııaqty. Mynaý endi qanshama ınfektsııa taratady? Jertólege úıimizge kirip jatqan shyǵar. Osy jerge balalar men áıelder qoqys tógýden qorqatyn boldy»,-deıdi Erjanov kóshesiniń turǵyny Sergeı Morgýnov.
Bul mańnan adamdar egeýquıryqty alǵash ret byltyrǵy jyly jazda baıqaǵan. Sol kezde dabyl qaqqan turǵyndar óz áreketterimen olardy ýlap qurta bastaǵan. Alaıda bıyl kóktem shyǵysymen olardyń qarasy birden kóbeıip ketip, jurttyń úreıin alyp otyr.
Qazybekbı aýdanynyń ákimshiliginiń málimetinshe, turǵyn úılerdi basqarý formasy bolsa, onda jándikterdi turǵyndar ózderi ýlaıdy, al mundaı basqarýy joq úılerden egeýquıryqty ýlaý sharasyn ákimshilik jasaıdy. Egeýquıryqtyń qoqys alańynda qaptaǵandyqtan onymen kúresti qoqys shyǵaratyn fırma aınalysýy kerek.
Áleýmettik jelilerde jarııalanǵan qaladaǵy egeýquıryqtar týraly beınejazba soń, qoqys shyǵaratyn fırma ókilderi olarmen kúresti bastap ketti. Osydan bir kún buryn munda egeýquıryqtardyń kózin qurtatyn ýly zat sebilgen.
Araılym Satybaldyqyzy
