Qaraǵandy kóshelerin kún saıyn 200-den astam adam dezınfektsııalaıdy

QARAǴANDY. QazAqparat - Qaraǵandyda dezınfektsııa jumystary jalǵasýda. Bul sharany Qaraǵandy garnızonynyń eriktileri men áskerı qyzmetshiler júrgizedi, dep habarlaıdy QazAqparat oblys ákimdiginiń resmı saıtyna silteme jasap.

Búgin búrikkishtermen Buqar jyraý, Núrken Ábdirov dańǵyldary jáne Álıhanov, Erýbaev kósheleri óńdeldi. Atalmysh jumystarǵa bes avto búrikkish stantsııasy, úsh órt sóndirý avtotsısternalary jumyldyryldy.

Qaraǵandy kóshelerine kúnine 200-den astam dezınfektor shyǵady. Olar 8,5 mln sharshy metrge jýyq qoǵamdyq aýmaqty óńdedi. Buǵan 62 tonnadan astam dezınfektsııalyq eritindi qoldanyldy. Sanıtarlyq óńdeý turǵyn úılerdiń aýlalarynda, balalar alańdarynda, jaıaý júrginshiler joldarynda, aıaldama pavılondarynda jáne Oktıabr aýdany men Qazybek bı atyndaǵy jol bólikterinde ótedi.

Zapastaǵy áskerı mindettiler arasynan jınaqtalǵan eriktiler tobyn búrikkishtermen jumys isteýge jibermes buryn, olar úsh kúndik oqý kýrsynan ótti. Dezınfektorlardyń qosymsha qaýipsizdigi úshin olarmen birge dárigerler brıgadasy erip júredi. Kúnine úsh ret barlyq qyzmetkerlerdiń temperatýrasy ólshenedi. Eriktiler men áskerı qyzmetshilerdi jumys oryndaryna arnaıy avtobýstarda jetkizedi, olardy árbir reısten keıin zalalsyzdandyrady. Jumysqa tartylǵandar «Patrıot» qorǵanysh kostıýmderimen, respıratorlarmen jáne aspaly búrikkishtermen qamtamasyz etilgen.

- Mine, arqamyzǵa osylaı 25 kg júk tıeımiz. Ony asyp alamyz da, kúni boıy júremiz. Barlyǵymyzdy jaqsy jabdyqtaǵany qýantady. Biraq árıne jigitter sharshaıdy. Aıaqtary qajalady, biraq ol qalypty jaǵdaı. Kúnine biz 20 shaqyrymnan astam júrip shyǵamyz, - deıdi zapastaǵy aǵa leıtenant «Jas Sarbaz» qozǵalysynyń tóraǵasy Rýstam Janalıev.

Aspaly búrikkishtegi hlorly eritindiniń qory 100 metrge jetedi. Kúnine 20 adamnan turatyn brıgada 2,5 tonna dezınfektsııalaý quraldaryn jumsaıdy.

- Qala turǵyndary túsinistikpen qaraıdy. Biz aýlalarǵa jumys isteýge barǵanymyzda qaraǵandylyqtar terezeden bizge qol shapalaqtaǵan sátter boldy. Olar bizdiń jumysymyzdyń mańyzdylyǵyn túsingeni óte qýantady, - dedi «Astana» óńirlik qolbasshylyǵy qolbasshysynyń orynbasary Qanat Daıyrov.

Ol sondaı-aq dezınfektsııalaý sharalarynyń tıimdiligi qala turǵyndarynyń karantındi qanshalyqty qatań saqtaýyna tikeleı baılanysty ekenin atap ótti.