Qaraǵandy kenshiler mádenıet saraıynyń jóndeý jumystary aıaqtaldy
QARAǴANDY. QazAqparat – Qaraǵandy kenshiler mádenıet saraıynda jóndeý jumystary aıaqtaldy. Úıirmelerge arnalǵan úı-jaılar, sahna jáne onyń jabdyqtary, kórermender zaly tolyǵymen jańartyldy, dep habarlaıdy QazAqparat tilshisi.
Mádenıet úıiniń dırektory Jarýlla Aqyshevtiń aıtýynsha, búginde saraı óz kórermenderin qabyldaýǵa daıyn.
«Sahna qaıta jabdyqtalyp, jóndeldi. Munda biz eski, apattyq jaǵdaıda bolǵan shtangalyq jabdyqty aýystyrdyq. Ony Belarýssııadan ákeldi. Qazaqstanda mundaı jabdyq alǵash ret bizde ornatyldy. Sahnada eden aýystyrylyp, jańa lınoleým, sondaı-aq arnaıy jabyn tóseldi. Búgingi kúni sahna jumysqa daıyn», – dedi Jarýlla Aqyshev.
750 adamǵa arnalǵan kórermender zalynda qabyrǵalar men tóbeler jańartylyp, jańa kilem tóseldi, kreslolar hımııalyq tazartýdan ótti.
Úıirmelerge, garderobqa jáne dárethanalarǵa arnalǵan bólmelerde jóndeý jumystary júrgizildi. Múmkindigi shekteýli jandarǵa arnalǵan pandýstar ornatylyp, sanıtarlyq torap jabdyqtalǵan.
Sondaı-aq, saraıda sý jáne jylý qubyrlary ishinara aýystyryldy. Shatyrǵa aǵymdaǵy jóndeý jumystary júrgizildi. Ǵımaratty jeldetýdiń jańa júıesin montajdaý jáne iske qosý boıynsha jumystar júrgizildi.
«Bizde 26 úıirme jumys isteıdi, onda 700-ge jýyq adam aınalysady. Olardyń qatarynda balalar da, eresekter de bar. Qazir qadaǵalaý organdarynyń sheshimin kútip otyrmyz. Barlyq jóndeý jumystary qabyldanǵan kezde, biz ujymdarymyzdyń qatysýymen mádenıet úıiniń saltanatty ashylýyn ótkizemiz», – deıdi Jarýlla Aqyshev.
Búgingi kúni Kenshiler mádenıet saraıynyń qasbettik bóligin jóndeý máselesi qalyp otyr. Ǵımarattaǵy músinderdiń jaǵdaıy máz emes – olar da jańartýdy qajet etedi.
